गुकेश परतून जोड रितीन पयले सुवातेर

भांगरभूंय | प्रतिनिधी

भारताचो युवा ग्रॅण्डमास्टर डी गुकेशान अझरबैजानाच्या निजात अबासोवाक हारोवन कॅण्डिडेट्स बुद्दीबळ सर्तीचे 12वे फेरये उपरांत परतून जोड रितीन पयली सुवात मेळयली. 11वे फेरये उपरांत एकोडे रितीन आघाडी घेवपी रशियेचो इयान नेपोम्नियाशीक भारताच्या आर प्रज्ञानंदान 12वे फेरयेंत बरोबरींत आडायलो.

विदित गुजराथीक अमेरिकेच्या फॅबियानो कारुआना कडल्यान हार घेवची पडली. ह्या निकाला उपरांत प्रज्ञानंद आनी विदित हे वस्तादपणाचे सर्तींतल्यान लागींलागीं भायर पडल्यात.

सर्तींत आतां फकत दोन फेरयो बाकी आसात आनी उक्त्या गटांत वस्तादपणा खातीर चुरस तयार जाल्या. 12वे फेरयेंत फ्रान्साच्या अलिरेझा फिरौझान अमेरिकेच्या हिकारू नाकामुराक हारयलो. ताका लागून पयली सुवात मेळोवपा खातीर गुकेश, नेपोम्नियाशी आनी नाकामुरा हांची बरोबरी जाली. ह्या तिगांयच्याय खात्यांत समान 7.5 गूण आसात. कारुआना फकत अर्द्या गुणान फाटीं आसा. ताका लागून ताची लेगीत वस्तादपण मेळोवपाची आस्त जिवी आसा.

प्रज्ञानंद स गुणां सयत पांचवे, विदित पांच गुणां सयत सवे, फिरौझा 4.5 गुणां सयत सातवे, जाल्यार अबासोव तीन गुणां सयत आठवे सुवातेर आसा. 13वे फेरये पयलीं विसवाचो दीस आसा.

बायलांच्या गटांत भारताची आर वैशालीन युक्रेनाचे अॅना मुझिचुकाक हारीचो धपको दिलो. वैशालीचें हें सेगीत तिसरें जैत थारलें. 12वे फेरयेंतल्यो हेर लडती बादाबाद उरल्यो.

चीनाची टॅन झोंगीक गुणतकट्यांत निमाणे सुवातेर आशिल्ले बल्गेरियाचे नुरग्युल सलिमोवाक हारोवपाक अपेस आयलें. पूण, तिणें गुणतटक्यांतली आपली पयली सुवात कायम राखली. तिचे आठ गूण आसात. दुसरे सुवातेर आशिल्ली ले टिंगजी ही झोंगी परस अर्द्या गुणान फाटीं आसा. तिका 12वे फेरयेंत कॅटेरिना लायनो आड बरोबरींत समाधान मानचें पडलें. आनीक एके लडतींत भारताचे कोनेरू हम्पीक रशियेचे अलेक्झांड्रा गोर्याचकिना आड बरोबरींत समाधान मानचें पडलें.

गुकेशान अबासोवा आड काळ्या घुलांनीा खेळटना निम्झो इंडियन बचाव पद्दतीचो अवलंब केलो. हाची अबासोवा कडेन जाप नाशिल्ली. डावाच्या मध्यांत अबासोवाक डावांत पुनरागमन करपाची संद आशिल्ली. पूण, गुकेशान अचूक चाली रचून आपलो शेक कायम उरतलो हाची काळजी घेतली. चड घुलो बाकी नाशिल्ल्यान अबासोव चेपणाखाला आयलो आनी अखेरेक 57वे चाली उपरांत अबासोवान हार मान्य केली.