भांगरभूंय | प्रतिनिधी
भारताचो युवा ग्रॅण्डमास्टर डी गुकेशान कॅण्डिडेट्स बुद्दीबळ सर्तीचे 11वे फेरयेंत अमेरिकेच्या फॅबियानो कारुआनाक बरोबरींत आडायलो. पूण, ह्या निकाला उपरांत लेगीत गुकेशाची गुणतकट्यांत जोड रितीन दुसरे सुवातेर घसरण जाली. उक्त्या गटांतल्या हेर दोन भारताच्या खेळगड्यांक हार घेवची पडली आनी ताचो फटको गुकेशाक बसलो.
भारताच्या आर प्रज्ञानंद आनी विदीथ गुजराथी हांकां 11वे फेरयेंत वळेरेन अमेरिकेच्या हिकारू नाकामुरा आनी रशियेच्या इयान नेपोम्नियाशीन हारयलो.
हे फेरये पयलीं 17 वर्सं पिरायेचो गुकेश आनी दोन सध्याचो कॅण्डिडेट्स वस्ताद नेपोम्नियाशी जोड रितीन पयले सुवातेर आशिल्ले. पूण, गुकेश आतां अर्द्या गुणान फाटीं पडला. उक्त्या गटांतले आनीक एके लडतींत फ्रान्साच्या अलिरेझा फिरौझान अझरबैजानाच्या निजात अबासोवाक हारयलो.
सर्तींत आतां फकत तीन फेरयो बाकी आसात. नेपोम्नियाशी सात गुणां सयत पयले सुवातेर आसा. गुकेश आनी नाकामुरा हांचे दरेकी 6.5 गुणां सयत जोड रितीन दुसरे सुवातेर आसात. कारुआना स गुणां सयत चवथे सुवातेर आसा, जाल्यार प्रज्ञानंदाची 5.5 गुणां सयत दुसरे सुवाते वयल्यान थेट पांचवे सुवातेर घसरण जाली. विदीत सवे, फिरौझा सातवे आनी अबासोव आठवे सुवातेर आसा. अबासोव आतां वस्तादपणाचे सर्तीतल्यान अधिकृत रितीन भायर पडला.
बायलांच्या गटांत चीनाचे बुद्दीबळ खेळगडयांचो शेक कायम आसा. टॅन झोंगीन रशियेचे कॅटेरिना लायनोव हिका हारोवन परतून पयली सुवात मेळयली. झोंगीच्या खात्यांत आतां सात गूण आसात. चीनाची ले टिंगजी सात गुणां सयत दुसरे सुवातेर आसा.
11वे फेरयेंत तिका युक्रेनाचे अॅना मुझिचुक आड बरोबरींत समाधान मानचें पडलें. भारताची आर वैशालीन रशियेचे अलेक्झांड्रा गोर्याचकिनाक हारयली. तशेंच कोनेरू हम्पीन गुणतकट्यांत निमाणे सुवातेर आशिल्ले बल्गेरियाचे नुरग्युल सलिमोवा हिका हारयली. हम्पी 5.5 गुणां सयत जोड रितीन तिसरे सुवातेर पावली.
उक्त्या गटांतले 11वे फेरयेंत भारताक निर्शेणी आयली. कारुआनाक बरोबरींत आडायल्या उपरांत गुणतकट्यांत जोड रितीन पयले सुवात कायम राखपाक गुकेशाक विदीता कडल्यान मजतीची गरज आशिल्ली. पूण, धव्या घुलांनी खेळपी विदीत बरे स्थितींत आशिल्लो. पूण, अखेरेक ताणें आपली पकड व्हगडायली आनी ताका नेपोम्नियाशी कडल्यान हार घेवची पडली. सुरवातीक विदीताक पेट्रॉफ बचावाक तोंड दिवचें पडलें. नेपोम्नियाशी 2018 सावन ह्या बचाव पद्धतीचो बरे तरेन वापर करीत आसा. पूण, विदीतान ताका खर आव्हान दिलें आनी डावाच्या मध्यांत स्वता खातीर बरी स्थिती निर्माण केली. पूण, नेपोम्नियाशीन आपलो सगलो अणभव लडतींत लावन आव्हान कायम राखलें. उपरांत वेळ उणो आशिल्ल्यान विदीताचेर चेपण आयलें आनी ताच्या हातांतल्यान साबार चुकी घडल्यो आनी हाचो फायदो घेत नेपोम्नियाशीन लडतीचेर पुर्णपणान नियंत्रण मेळयलें.
ताणें सहज रितीन विदीताच्यो घुलो मारल्यो आनी अखेरेक 67 चाली उपरांत जैताची नोंद केली. हे हारी उपरांत विदीत सामको निर्शेल्लो दिसलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
