भांगरभूंय | प्रतिनिधी
पणजी: चित्रकार, कवी गौरीश वेर्णेंकार हांकां कोंकणी साहित्य मळार उत्कृश्ट सेवे खातीर द. गोवा हिंदू असोशियनाचो अ. ना. म्हांबरो साहित्य पुरस्कार जाहीर जाला.
कवी वेर्णेंकार हांचें कोंकणी साहित्य मळार काणी काणी कोतवा, शून्य, अर्थ अशे जायते कविता संग्रह प्रसिद्ध जालयात. तशेंच श्री क्षेत्र मल्लिकार्जुन, आदिमहालसा, माटोळी अशीं गीतां तांणी स्वता बरोवन संगीतबद्ध केल्यांत. तांचे अभंग आनी भावगीतां, भजनी गितांचो संग्रह, ‘पापा’ हो निबंध संग्रह आनी जायतीं पुस्तकांय प्रकाशीत जाल्यांत.
तांचीं अस्तित्व, प्रस्न, हांव मनीस, अश्वत्थामो हीं नाटकां प्रकाशीत जाल्यांत. तांकां आतां मेरेन कोंकणी अकादमीचो भास सेवा पुरस्कार, युवा चैतन्य पुरस्कार , आदर्श मित्र पुरस्कार, चारोळी पुरस्कार, उजवाड् कला गौरव पुरस्कार, युवा दी गोवा पुरस्कार, नेहरू युवा पुरस्कार अशे जायते पुरस्कार फावो जाल्यात. गुवाहाटी, छत्तीसगड, दिल्ली, मुंबय, कोची हांगा साहीत्य अकादमी वतीन घडोवन हाडिल्ल्या राष्ट्रीय पांवड्यावेल्या कवीसंमेलनांनी, साहित्य संमेलनांत तांणी वांटो घेतला. अखिल भारतीय कोंकणी परीशद, गोवा कोंकणी अकादमी, कविता ट्रस्टा वतीन घेतिल्ल्या कवी संमेलनांत वांटो घेतला. कोंकणी लेखक संघाचे ते आतांचे अध्यक्ष. तशेंच अखील भारतीय कोंकणी परीशदेचे ते कार्यदर्शी आशिल्ले.
शेनवार २१ डिसेंबराक जावपी द गोवा हिंदू असोसिएशनाच्या वर्धापन दिसा सांजेवेळार ४ वरांचेर दादर मुंबयच्या बीयन वैज्ञ सभाघरांत पुरस्कार भेटवण सुवाळो जातलो. मुखेल सोयरे म्हणून ज्ञानपीठ पुरस्कार जैतिवंत दामोदर मावजो हजर रावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
