गिरी अपघात: ट्रक सर्व्हीस रोडार कोसळून एकल्याक मरण, स जाण जखमी

भांगरभूंय | प्रतिनिधी

म्हापशें, प्रतिनिधीः गिरीच्या ग्रीनपार्क जंक्शन उड्डाण पुला वयल्यान ट्रक सर्व्हीस रोडार कोसळ्ळो. ह्या भिरांकूळ अपघातांत सल्मॉन हेंब्रॉम (२१, थिवी, मूळ झारखंड) ह्या कामगाराक ट्रका पोंदाक चिड्डून मरण आयलें. जाल्यार तीग जाण जखमी जाले. तांतलो एकलो गंभीर आसा. जखमी मदीं प्रमेशल मवंदी (२१), सोरबेश मवंदी (१७), बुद्धीराम मवंदी (१७) आनी चालक बहिराम मवंदी (२६) हांचो आसपाव आसा. हे सगळे जाण झारखंडाचे.
प्रमेशल हो ट्रकाच्या कॅबिनांत आडकल्ल्यान ताचो हात फ्रॅक्चर जावन तो गंभीर जखमी जालो. ताचेर म्हापशें जिल्हो हॉस्पिटलांत उपचार सुरू आसात. जाल्यार हेर तिगांनी जीव वाटावपाक ट्रकांतल्यान उडी मारिल्ल्यान तांकां दुखापत जाल्या.
अपघात बुधवारा सकाळीं ५.३० वरांचेर जालो. जखमी आनी मरण आयिल्लो थिवेच्या सेड्रीक डिसोझा हांचे कडेन कामाक आशिल्ले आनी थंयच ते रावताले. जीए ०३ के ०८३७ क्रमांकाचो हो कोयर व्हरपी ट्रक थिवेच्यान पणजे वटेन कोयर हाडपा खातीर वतालो. तो गिरीच्या ग्रीन पार्क उड्डाण पुलाचेर पावलो तेन्ना ट्रक चालक बहिराम हाचें गाडये वयल्यान नियंत्रण सुटलें आनी ट्रकान उजवे वटेनच्या डिव्हायडाराक धपको दिलो. उपरांत चुकीच्या मार्गान वचून हो ट्रक पुला वयल्यो बॅरीकेडस् तोडून सकयल सर्व्हीस रस्त्यार कोसळ्ळो.

अपघाता वेळार मरण आयिल्लो हेंब्रॉम हो हेर दोगां वांगडा ट्रका फाटल्यान बशिल्लो. ट्रकान डिव्हायडराक धपको दिले उपरांत चालक बहिराम आनी फाटल्यान बशिल्ल्या मोरबेश आनी बुद्धीराम ह्या तिगांयनी जीव वाटावपाक ट्रकांतल्यान भायर उडी मारली. जाल्यार प्रमेशल हाका कॅबिनांतल्यान भायर सरपाक मेळूंक ना. फाटल्यान बशिल्ल्या सल्मॉन हेंब्रॉम हाका भायर उडी घेवपाक मेळूंक नाशिल्ल्यान तो उमथल्ल्या ट्रका पोंदाक चिड्डलो.
ह्या अपघाताची म्हायती सकाळीं ६ च्या सुमाराक म्हापशें पुलीस आनी उजो पालोवपी दळाक मेळ्ळी. दळाचे उपअधिकारी ज्ञानेश्वर सावंत आनी वांगडी जवानांनी घडणुके सुवातेर वचून ट्रकाच्या कॅबिनांत आडकल्ल्या जखमीक भायर काडलो. उपरांत ट्रका पोंदाक चिड्डल्ल्याची कूड भायर काडली.
पुलीस उपनिरीक्षक अजय धुरी आनी हवालदार अभिजित माणगांवकार हांणी पंचनामो केलो. ट्रक चालक बहिराम हाचे आड पुलिसांनी गुन्यांव नोंद करून अटक केली.