भांगरभूंय | प्रतिनिधी
पणजी : प्रदेश कॉंग्रेसीचे आदले अध्यक्ष गिरीश चोडणकार हांणी ८ आमदारां आड दाखल केल्ले अपात्रताय याचिकेवेली सुनावणी पुराय जाल्या. सभापती रमेश तवडकार हांणी निवाडो राखून दवरला. सभापतींच्या कार्यालयांतल्यान ही म्हायती मेळ्ळी. सोमवारा मेरेन लेखी बाजू सादर करपाची सवलत याचिकादार तशेच प्रतिवादींक दिल्या. लेखी बाजू सादर केले उपरांत निवाडो दितले अशी म्हायती याचिकादाराचे वकील अभिजीत गोसावी हांणी दिली.
याचिकादार तशेच प्रतिवादीं वतीन निमाणो युक्तीवाद पुराय जाला. दिगंबर कामत, मायकल लोबो, दिलायला लोबो, केदार नायक, रूडाल्फ फर्नांडीस, राजेश फळदेसाय, संकल्प आमोणकार आनी अलेक्स सिक्वेरा हांणी सप्टेंबर २०२२ त कॉंग्रेसींतल्यान भाजपांत प्रवेश केल्लो. कॉंग्रेसींत वेगळो गट स्थापन करून त्या गटाचें भाजपांत विलीनीकरण जाल्लें. पक्षांतरबंदी कायद्या खाला कॉंग्रेसीच्या ८ आमदारांचो भाजप प्रवेश बेकायदो थारता, असो दावो करीत गिरीश चोडणकार हांणी अपात्रताय याचिका दाखल केल्ली. हे याचिकेचेर सोमारा सुनावणी पुराय जाली.
ह्यान पयलीं डॉम्निक नोरोन्हा हांणी दाखल केल्ली अपात्रताय याचिका सभापती रमेश तवडकार हांणी भायर मारपाक सांगिल्ली. प्रदेश कॉंग्रेस अध्यक्ष अमित पाटकार हांणी दाखल केल्ली अपात्रता याचिका सभापतींकडेन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
