भांगरभूंय | प्रतिनिधी
म्हापशें, प्रतिनिधी ः गुन्यांव फांट्यान गिरी धाड घालून दुबावीत आशा लकरा (40, छत्तीसगड) हिचे कडल्यान 6.8 लाखांचें 268 ग्राम एमडीएमए आनी एक्टसी ड्रग्स जप्त केलें.
मेळिल्ले म्हायती प्रमाण, गुन्यांव फांट्यान काल 19 सप्टेंबराक अग्निवाडो-गिरींतल्या रमाकांत कवठणकार हांच्या भाड्याच्या कुडीचेर धाड घाली. चवकशे वेळार थंय हाजीर आशिल्ल्या आशा अजय लाक्रा (40, मुळ छत्तीसगड) हिचे कडल्यान पुलीस अधिकाऱ्यांनी एमडीएमए आनी एक्टसीच्यो 268 गुळयो जप्त केल्यो. ह्या गुळयांचें वजन 118.537 ग्राम आसा, आंतरराष्ट्रीय बाजारांतल्या दरा प्रमाण ह्या ड्रग्सांचें मोल 6.8 लाख रुपया आसा अशीं म्हायती मेळ्ळ्या.
हे संबंदी आशा लाक्राचेर ड्रग्स विरोधी कायद्याच्या कलमा खाला गुन्यांव नोंद करून अटक केली. ह्या प्रकरणांत पुलीस अधीक्षक राहुल गुप्ता आनी उपअधीक्षक राजेश कुमार हांच्या फुडारपणा खाला पुलीस निरिक्षक लक्षी आमोणकार फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
