भांगरभूंय | प्रतिनिधी
पणजी, बातमीदार : हांगा जाल्ले पत्रकार परिशदेंत आयज उटाचे अध्यक्ष प्रकाश वेळीप हांणी कांय प्रस्न मांडले. तांणी म्हणलें, सभापती रमेश तवडकार हांणी काणकोणा कोट्यांनी रुपया खर्च करून विवीध कार्यावळी केल्यो. सरकारी जाग्यार भाडें फारीक करिनासतना कार्यावळी आयोजीत केल्ल्याचे आरोप जाल्यात. तांच्या शिक्षण संस्थांकूय कोट्यांनी रुपयांचो निधी मेळ्ळा. हें सगळें कायदेशीर? असो प्रस्न करून तांणी सरकारान हाचेर चवकशी करची अशी मागणी केली.
वेळीप हांणी फुडें सांगलें, कला आनी संस्कृती मंत्र्याचेर फाटल्या कांय दिसां सावन कारणा बगर आरोप जातात. कांय जाण मंत्री गावडे हांकांच लक्ष्य करता. काणकोणा कांय जाणांनी पत्रकार परिशद घेवन गावडे हांणी कार्यावळ करिनासतनाच संस्थांक पयशे दिल्ल्याचो सामको फटीचो आरोप केला. खरें म्हळ्यार ह्यो सगल्यो कार्यावळी जाल्यात. हांतले एक कार्यावळींत मुखेल सोयरो म्हणून तर हांवूच गेल्लो अशें तांणी म्हणलें.
ह्या विशया विशीं कांयच जाणून घेनासतना सभापतींनी विधानसभा अधिवेशन सुरू असतना हो विशय मांडलो. हें चुकीचें. स्वता कंवचेच्या घरांत रावप्यांनी दुसर्यांचेर फातर मारचो न्हय. गावडोंगरी आनी बार्शी हांगा येवपी केंद्रीय प्रकल्पांत कोण आडमेळें हाडटा? पर्वरे एसटी विद्यार्थ्यां खातीर बांदपी वसणुकेचें काम कोणाक आडकून उरलां? हाचीय चवकशी जावप गरजेचें, अशी मागणी वेळीप हांणी ह्या वेळार केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
