भांगरभूंय | प्रतिनिधी
पणजी : गायो, म्हसरां, सुण्यां सयत पोशिल्ल्या जनावरांचे शस्त्रक्रीये खातीर आतां जनतेक १ हजार रूपया मेजचे पडटले. हातूंत निर्बीजीकरणा खातीरचे शस्त्रक्रीयेचो आसपाव जावचो ना. सुणे आनी मांजराच्या निर्बीजीकरणाची शस्त्रक्रीया फुकट आसतली.
पशूसंवर्धन आनी पशूचिकित्सा खात्यान जनावरां आनी पोशिल्ल्या जनावरांचेर उपचाराचे दर निश्चीत केल्यात. दर निश्चीत करपी अधिसुचवणी खात्यान जारी केल्या. गायो, म्हसरां सयत पोशिल्ल्या जनावरांचेर उपचार करपाक राज्यांत जायते कडेन पशूसंवर्धन खात्याचीं केंद्रां आसात. व्हडल्या केंद्रांनी पशूवैजकी डॉक्टरांची वेवस्था आसता. हेर सुवातांचेर पशूवैजकी साहाय्यक आसतात. गांवगिर्या वाठारांतल्या दुद उत्पादक शेतकारांक ह्या केंद्राक व्हड आदार जाता.
विवीध उपचारां खातीर आतां दर निश्चीत केल्यात : निर्बीजीकरण सोडून एनेस्थेशिया संबंदीत शस्त्रक्रीये खातीर १ हजार रूपयांचें शुल्क लागू जातलें. शस्त्रक्रीये उपरांतच्या उपचारां खातीर (निर्बीजीकरण सोडून) सत्राक २०० रूपया शुल्क लागू जातलें. सुणे आनी मांजरांच्या निर्बीजीकरणाची शस्त्रक्रीया फुकट आसतली. निर्बीजीकरण शस्त्रक्रीये उपरांत पयले ५ दीस फुकट उपचार करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
