भांगरभूंय | प्रतिनिधी
पदवी आनी भौशीक भलायकेंत पदव्युत्तर शिक्षण घेतले उपरांत ताणें ‘शॉर्ट सर्विस कमिशना’ खातीर अर्ज केलो. पूण
पयले नदरेन पळयल्यार, एक सडसडीत आनी उंच मनीस म्हणून तुमी ताका वळखतले. पूण जशें तुमी ताचे लागीं पावतले, तेन्ना तुमकां जाणवतलें की ताची इत्साशक्तीच गर्दीक एकठांय दवरता. स्क्वॉड्रन लीडर (निवृत्त) डॉ. स्वप्नील सालेलकार हें एक अशें व्यक्तिमत्व जांचें जिवीत एका आघाड्या वयल्यान दुसऱ्या आघाडेचेर बदल्लां—भारतीय वायुसेनेच्या व्हड जबाबदारींतल्यान गोयच्या आपल्या गांवच्या आरोग्याचें आनी वारशाचें रक्षण करपाखातीर.
गोंयच्या सह्याद्रीच्या कुशींतल्या कारापूर सारख्या सोबीत गांवांत जल्मल्ल्या स्वप्नीलाचें भुरगेपण निसर्गाच्या सानिध्यांत गेलें. न्हंयेच्या निवळ उदकांत न्हावप आनी काजू, आंबे आनी चारामेरांचो आस्वाद घेवप. ताचें प्राथमिक शिक्षण थळावे सरकारी प्राथमिक शाळेंत जालें, जंय सुटयेच्या दिसांनी गाड्यां विशीं आनी राखणदारांच्या कथांनी जिवीत भरिल्लें आसतालें.
एका साद्या कुटुंबांतल्यान आयिल्ल्यान ताका गरिबीची जाण तेन्ना नासली. एका ल्हान घरांत रावन, येरादारीच्या उणावाक लागून भर पावसांत आनी उज्या सारख्या वतांत चार किलोमीटर पायवाट चलून ताका हायस्कूलाक वच्चें पडटालें. पूण ताच्या मनांत सेवेची ओड तेन्नाच जागृत जाल्ली. “तो एक शांत, उलोवपांत उणो, पूण जिद्दीचो भुरगो आशिल्लो,” अशें ताची आवय म्हणटाली.
ध्येयाचो ध्यास
बारावी उपरांत ताका लश्करांत वचपाची इत्सा आशिल्ली, पूण नशिबान ताका वैजकी क्षेत्रांत हाडलें. 2000 वर्सा कारापूर गांवांतल्यान गोंय वैजकी म्हाविद्यालयांत प्रवेश मेळोवपी तो पयलो तरुण थारलो. पदवी आनी भौशीक भलायकेंत पदव्युत्तर शिक्षण घेतले उपरांत ताणें ‘शॉर्ट सर्विस कमिशना’ खातीर अर्ज केलो. पूण नवी दिल्लीच्या आर अँड आर आर्मी हॉस्पिटलांत ताका कमी वजनाक लागून बाद केलो, तेन्ना ताका व्हड दुख्ख जालें.
हार मानिनासतना ताणें बिहारांत जागतिक आरोग्य संघटने खातीर काम सुरू केलें. नॅशनल पोलिओ सर्व्हेलन्स प्रोग्राम अंतर्गत ताणें कठीण हवामानांत आनी हुंवाराच्या संकटांत गांवांगांवांनी भोंवडी केली. 2009 त गोयांत स्वाइन फ्लूच्या वेळार काम करप आसूं वा सांखळी भलायकी केंद्रांत शेंकड्यांनी दुयेंतींची सेवा करप, ताचें मन अजूनय त्या वर्दी खातीर आशेतालें.
वायुसेनेंत प्रवेश आनी सेवा
कांय वर्सांचे कडक मेहनती उपरांत, तांचो “निमणो प्रयत्न” यशस्वी थरलो. जून 2016 त ताची भारतीय वायुसेनेंत ‘फ्लाइट लेफ्टनंट’ म्हणून निवड जाली. ताची लष्करी कारकीर्द प्रभावशाली आशिल्ली. एअरमन ट्रेनिंग सेंटर: तरणाट्या सैनिकांक मानसिक आधार आनी समुपदेशन दिलें. बागडोगरा डोकलाम स्टँडऑफ आनी सर्जिकल स्ट्रायकाच्या संवेदनशील काळांत ‘चिकन्स नेक’ वाठारांत वैजकी अधिकारी म्हणून सेवा दिली.
डिझास्टर मॅनेजमेंट इन्स्ट्रक्टर म्हूण दिल्लींत तिन्ही दळांच्या सैनिकांक आपत्कालीन परिस्थिती हाताळपाचें प्रशिक्षण दिलें. कोविडाच्या काळांत ताणें लसीकरण मोहीम आनी क्वारंटाईन केंद्रांचें फुडारपण केलें.
नवी मोहीम: कारापूरचो राखणदार
डिसेंबर 2021 त निवृत्त जाले उपरांत ताणें विश्रांती घेतली ना, तर आपली मोहीम बदलली. डॉ. सालेलकर आपल्या कारापूर गांवांत परतले आनी कॉर्पोरेट हॉस्पिटलांत वचपा परस गांवांत प्रॅक्टिस सुरू केली.
आज ते फकत एक दोतोर न्हय, तर गांवचे राखणदार जाल्यात. आपल्या लष्करी प्रशिक्षणाचो उपेग करून ते गांवांतल्या अभिनंदन लोढा हांच्या व्हड गृहनिर्माण प्रकल्पा आड लढा दिवपी चळवळीचें फुडारपण करतात. तांच्या मतान, हो प्रकल्प गांवाची पर्यावरण वेवस्था, लोकसंख्या आनी थळाव्या लोकांच्या रोजगाराक धोको निर्माण करता. तांची काम करपाची पद्दत ‘आयएएफ’ सारकीच शिस्तबद्ध आनी अभ्यासू आसा.
सेवेचा वारसो
तांच्या या कार्यांत तांची घरकान्न, वैज आनी लेखिका डॉ. सरोज स्वप्नील सालेलकर तांकां पूर्ण साथ दितात. सामाजिक कार्या वांगडाच ते ‘आर्ट ऑफ लिव्हिंग’चे स्वयंसेवक म्हणून लोकांच्या मानसिक स्वास्थ्या खातीर काम करतात.
डॉ. सालेलकर हांचें मानप आसा की, दर एका नागरिकान एकदां तरी लश्करी सेवा करपाक जाय, जेणें करून शिस्त आनी जबाबदारीची जाण येली. “एकदां सैनिक, तो सदांच सैनिक,” हें तांणी आपल्या कृतीन दाखोवन दिलां. गोयच्या एका कोनशाक बसून हो निवृत्त अधिकारी आपल्या गांवाची जैवविविधता आनी परंपरा तिगोवन दवरपा खातीर झुजता.
सलाम फौजी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
