भांगरभूंय | प्रतिनिधी
फोंडें: दोन-तीन दीस चालू आशिल्ल्या उटंगारान पडटल्या पावसाचें उदक घरांत भितर सरिल्ल्यान तशेंच घरा भोंवतणी सांचिल्ल्यान गांवठण-वेलंगाचे कृष्णा शिवराम नायक हांच्या घराच्यो वण्टी कोसळून मातये भरवण जाल्यो. हातूंत सुमार तांकां 5 लाखाचें लुकसाण जालें.
मेळिल्ले खबरे प्रमाण कृष्णा शिवराम नायक हे ह्या वाठारांतले नम्र, गरीब आनी गरजवंत नागरीक. चवथी निमतान गांवच्या सुमार 60 लोकांच्या घरा खातीर गणपतीच्यो मुर्ती तयार करता आनी आपली रोजी-रोटी चलयता. चवथ लागीं आयिल्ल्यान गणपती करपाचें तांचें काम चालू आशिल्लें.
पूण फाटले दोन तीन दीस उटंगाराचो पावस पडिल्ल्यान घरांत भितर उदक सरिल्लें. तेच प्रमाण घरा भोंवतणी उदक भरून रावलें. दोन दीस रात-दीस घरांत भरिल्लें उदक उसपुपाचो यत्न तांणी केलो. मात काल (मंगळारा) सकाळीं धा वरांचेर कृष्णा घरांत गणपतीचें काम करीत आसतना अचकीत घराची वणत कोसळ्ळी आनी उपरांत हेर वण्टी कोसळ्ळ्यो. हाका लागून घरांतल्या सामानाचें लुकसाण जालें.
सुदैवान कृष्णाची स वर्सांची चली शाळेंत गेल्ल्यान आनी घरकान्न भायर सरिल्ल्यान कसलीच जिवीतहानी जावंक पावली ना. घराच्यो वण्टी कोसळिल्ल्यान सुमार 4 ते 5 लाख रुपयांचें लुकसाण जालें. घर बांदपाक कोणेय आपल्याक मजत केल्यार आपूण तांचें रीण कशेंय तरी फारीक करीन अशें कृष्णा नायक म्हणटां.
घडणुकेची खबर कळना फुडें फोंडें उजो पालोवपी दळाचे अधिकारी मोरजकार आनी कर्मचारी आवेश प्रभू घडणूक सुवातेर येवन घरांत आनी घरा भोंवतणी भरिल्लें उदक पंपाचे मजतीन काडलें. थळावे पंचायतीच्यो सरपंच हर्षा गावडे हांणी भेट दिवन पळोवणी करून गेल्यो.
घराच्यो वण्टी कोसळून आपलो संवसार उबंत पडला. सरकारी पांवड्यार कोणेय तरी आपणाक मजत करची असो उलो पिडीत कृष्णा नायक हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
