गांधीजीन देशांत  रामराज्य हाडपाचे यत्न केले. अमित पाटकारः म्हापश्यां काँग्रेस पक्षा वतीन गांधी पुण्यतीथ पाळ्ळी

भांगरभूंय | प्रतिनिधी

भांगरभूंय । प्रतिनिधी
म्हापशेंः  महात्मा गांधीजीन अहिंसेच्या मार्गान स्वातंत्र्याची चवळव फुडें व्हेली, बापू हे व्हडले फुडारी आशिल्ले. देशाक स्वातंत्र्य मेळ्ळ्या उपरांत कांय म्हयन्यां भितर 30 जानेवारी 1948 दिसा आरएसएसाचो वांगडी आशिल्ल्या नथुराम गोडसे हाणे गुळयो घालून गांधीजीक मारून वडयलें. गांधीजींच्या तोणांत निमण्या वेळार हे राम हे शब्द आशिल्ले. ताणे खऱ्या अर्थान  देशांत रामराज्य हाडपाचो आनी देश एकचार जावचो म्हणून यत्न केल्लें, अशें प्रदेश काँग्रेस अध्यक्ष अमित पाटकार हाणे सांगलें.
मंगळारा (30 जानेवारी) सकाळीं म्हापश्यांत उत्तर गोंय जिल्हो काँग्रेस समितीन महात्मा गांधी हांच्या पुण्यतीथ निमतान कार्यावळीचें आयोजन केल्लें. त्या वेळार काँग्रेस पदाधिकाऱ्यांनी हुतात्मा दिसा निमतान हुतात्म्यांक आनी गांधीजींक आर्गां ओपलीं. शारांतल्या गांधी चौकांत वचून गांधीजींच्या पुतळ्याक फुलां हार घातले.  ह्या वेळार हणदोणचो आमदार अॅड कार्लुस फेरेरा, पक्षाच्या महिला काँग्रेस प्रदेशाध्यक्ष बिना नायक, आदले केंद्रीय कायदोमंत्री अॅड रमाकांत खलप, सरचिटणीस विजय भिके, वीरेंद्र शिरोडकार आनी पक्षाचे वावुरपी व्हडा संख्येन हाजीर आशिल्ले.
अमित पाटकारान फुडें सांगलें की जांत्या तोणांत नावां पुरते महात्मा गांधीचें नांव आसा आनी काळजांत मात नथुराम गोडसे आसता तेन्ना देशाची वाटचाल रामराज्या कडेन जावपाक शकना. भाजपा आनी राष्ट्रीय स्वयंसेवक संघाच्या लोकांनी महात्मा गांधीचे विचार तोणा पुरते मर्यादीत दवोरनास्तना ते मनांत रिगोवचे अशी आयच्या दिसाची हीच एक अपेक्षा आसा. गोडसे हांचे विचार कुशीक दवोरचे, काण व्हो राष्ट्राचो आनी देशांतल्या लोकांचो प्रस्न आसा. गांधीजीचीं धोरणा फुडें व्हरपा खातीर सगल्यांनी एकवटीत जावपाची गरज आसा अशें पाटकारान सांगलें.
 महात्मा गांधी हे संवसारीक कीर्तीचे फुडारी आशिल्ले. नोबेल पुरस्कार संवसाराक अंतरल्यात तांकां मेळना. पूण गांधीजींक नोबेल शांती पुरस्कार दिवपाचो विचार केल्यार ते अयोग्य धारचें ना अशें  रमाकांत खलप हाणे सांगलें. लोकसभा वेंचणूक लडोवपाक इत्सुक आशिल्ल्यां कडल्यान काँग्रेस पक्षान अर्ज मागयल्यात. हांव सद्या बरें मागपी, इश्ट आनी पक्षांतल्या सगल्या आघाडीं कडेन सल्लोमसलत करता. चर्चे उपरांत हांवें लोकसभा वेंचणूक लडोवपाची काय ना हाचेर निमणो निर्णय घेतलो. पक्षान तिकेट दिल्यार वेंचणूक लडयतोलों. पक्षान सगल्यांक मान्य असो उमेदवार वेंचून काडपाक  जाय अशें खलप हाणे सांगलें.
आमदार कार्लुस फेरेरा हांणी सांगलें की लोकसभे खातीर काँग्रेस पक्ष कामाक लागला. लोकांच्यो भावना मतींत घेवंन आमी उमेदवार उबो  करतले. काँग्रेस पक्षांत लेगीत हेर राजकी पक्षां प्रमाण वेंचणूक लडोवपाक जायते इत्सूक आसात. पक्षा खातीर उत्तर आनी दक्षीण गोंयच्यो सुवातो म्हत्वाच्यो आसात आनी आमी त्यो दोनूय जिखतले. खंयचेय परिस्थितींत आपूण काँग्रेस पक्ष सोडचो ना हें तांणे स्पश्ट केलें. सरकारान ,सोशल मीडियाच्या  इन्फ्ल्यूएन्सरच्या माध्यमाच्या माध्यमांतल्यान सरकारी कामां विशीं जाग्रुताय करपाचो निर्णय घेतला. सरकार टॅक्सपेयरांचें पयशे नाका त्या कामा खातीर खर्च करता. सद्या वॉट्सअ‍ॅप युर्निव्हर्सिटी सुरू केल्या. तातूंतल्यान फटीची म्हायती पातळायतात. सरकाराक कितें सांगपाचें आसल्यार स्वता सांगचें, शल मीडिया इन्फ्ल्यूएन्सर कित्याक जाय. शिवाय सरकार सांगता की हे इन्फ्ल्यूएन्सर  गोंयची बदनामी करतात. तशें जाल्यार तांकां अटक कित्याक करनात असो प्रश्न फेरेरा हांणी विचारला.