भांगरभूंय | प्रतिनिधी
थळाव्यांक सोंसचो पडटा त्रास; हॉटमिक्स डांबरीकरण करपाची मागणी
फोंडें: उसगांव पंचायत क्षेत्रांतल्या नाणूस आनी गांजे वाठारांत सद्या भुंयगत वीज वाहिन्यो घालपाचें काम सुरू आशिल्ल्यान गांवांत धुल्लाचें साम्राज्य पातळ्ळां. अशीर रस्त्याक लागून आनी येरादारी वाडिल्ल्यान फाटल्या कांय दिसा सावन थळाव्या लोकांक धुल्लाचो त्रास सोंसचो पडटा. रस्त्या वेलीं फोंडकुलां लेगीत वाहन चालकां खातीर तकलीफोड थारल्या. हे खातीर रस्त्याची दुरुस्ती करून हॉटमिक्स डांबरीकरण करपाची मागणी थळाव्या लोकांची आसा.
उसगांव ते गांजे मेरेन भुंयगत वीज वाहिन्यो घालपाचें काम सुरू आशिल्ल्या कारणान अशीर रस्त्या वेल्यान वाहनां वचत आशिल्ल्यान गांवांतल्या लोकांक धुल्लाचो त्रास सोंसचो पडटा. रस्त्याचे कुशीक आशिल्ल्या घरांनी व्हड प्रमाणांत धुल्ल वचत आशिल्ल्यान भलायकेचेर परिणाम जावपाची भिरांत लोकांनी उक्तायल्या.
गांजे आनी नाणूस रस्त्याचे कुशीक आशिल्ल्या घर धनयांनी तशेंच दुकानदारांनी रस्त्याचे कुशीक फातर दवरून धुल्ला पसून सुरक्षीत रावपाचो यत्न केला. पूण रस्त्या वेल्या फोंडकुलाक लागून धुल्लाचें साम्राज्य सेगीत दिसून येत आशिल्ल्यान रस्त्याचे कुशीक आशिल्ल्या दुकानदारांनी प्लास्टीक पोतयो लावन दुकानांतलें सामान सुरक्षीत दवरपाचो यत्न केला. वाठारांतल्या रस्त्याचे फाटल्या कितल्याशाच वर्सां सावन हॉटमिक्स करूंक नाशिल्ल्यान ताचो फटको थळाव्या लोकांक बसता.
भुंयगत वीज वाहिन्यो घालपाचें काम सुरू आसतना खूबशा सुवातांनी आवश्यक ती खबारदारी घेतिल्ली दिसून येता. ताका लागून अशीर रस्त्यार वाहन चालकाची धांदळ जाता. तातूंत खूबशे कडेन उदकाच्यो वाहिन्यो फोडिल्ल्याचें दिसून येता. ताका लागून दुचाक्यो निसरून अपघात घडपाची शक्यताय वाडल्या.
उसगांव वाठारांतल्यान व्हड प्रमाणांत पर्यटक बोंडला प्राणी संग्रहालयांत यो-वच करीत आसतात. बोंडला जंक्शना कुशीक सद्या घातक स्थिती निर्माण जाल्या. अशीर जंक्शनार भुंयगत वीज वाहिन्यो घाल्ले सुवातेर फोंडकुलाचो धोको अदीक उप्रासता. वाळपय सावन येवपी वाहनां जंक्शना कुशीक पावले उपरांत गोंदळटात. जंक्शनार मोटो अपघात घडपाची शक्यताय न्हयकारूं येना. जंक्शना कुशीक कांय म्हयन्यां पयलीं फुटिल्ल्या उदकाची वाहिनी कुशीच्या रस्त्यार घाल्लें सिमेंट अदीक घातक जालां. जंक्शनार वाहन चालकांक सुचोवणी दिवपी फलक लेगीत वाठारांत लायिल्ले नात. जंक्शना कुशीचे अपघात आडावपा खातीर रस्त्याच्या दोनूय वटांनी फलक लावपाची मागणी लोक करीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
