गरजेची सेवा वेळार दिवपा खातीर खात्यांनी आधुनीक पद्दत आपणावची
भांगरभूंय | प्रतिनिधी
मुख्यमंत्र्यान घेतली खात्यांच्या सचिवांची बसका
पणजी, प्रतिनिधी : जनतेक गरजेच्यो सेवा वेळेत आनी योग्य तरेन मेळपा खातीर खात्यांनी आधुनीक पद्दत आपणावची, अशें निर्देश मुख्यमंत्री डॉ. प्रमोद सावंत हांणी खात्यांच्या सचिवांक दिले. खात्यांचे सचीव, आयएएस तशेंच आयपीएस अधिकाऱ्यांची मुख्यमंत्र्यांनी बसका घेतली.
गरजेच्या सेवां सयत मुळाव्या सुविधांच्या प्रकल्पांचो नियाळ घेतलो. मुळाव्या सुविधांचे प्रकल्प वेळार पुराय जावपा खातीर नव्यो आनी योग्य पद्दती आपणावपाची गरज मुख्यमंत्र्यान उक्तायली. प्रकल्प पुराय जावपाक कळाव जालो, जाल्यार खर्च वाडटा. योग्य पद्दती कार्यवायेत हाडून येणावळ वाडोपाचेर खात्यांनी भर दिवचो, असो सल्लो तांणी दिलो.
केंद्र सरकाराच्या येवजण्याच्या कार्यवायेचो नियाळ बसकेत घेतलो. सरकारी कर्मचाऱ्यां मदीं शिस्त निर्माण करपाचे यत्न जावपाक जाय. जनतेक वेळार सेवा दिवपा खातीर थळावी कार्यालया घटमुट करपाचे निर्देश मुख्यमंत्र्यांन दिले. अधिवेशन सोंपल्या उपरांत मुख्यमंत्री बरेच सक्रीय जाल्या. खात्यांक अचकित भेटी दिवपा सयत बसकांचो धडाको तांणी सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
