भांगरभूंय | प्रतिनिधी
खुनाचो गुन्यांव नोंद; मुखेल दुबावीत रामकृष्ण भालेकार फरारी
म्हापशें: गणेशपुरी, म्हापश्यां जाल्ल्या खुनी हल्ल्यांत खर जखमी जाल्लो अहमद देवडी (30, लक्ष्मीनगर, म्हापशें) हाका उपचारा वेळार काल (मंगळारा) मरण आयलें. म्हापशें पुलिसांनी आतां ह्या प्रकरणांत सगल्या दुबावितां आड खुनाचो गुन्यांव नोंद केला. ह्या हल्ल्यांतलो मुखेल दुबावीत आरोपी रामकृष्ण भालेकार उर्फ आरके आनी बाबू भालेकार हे दोगूय सख्खे भाव अजून फरार आसात.
हो खुनी हल्लो फाटल्या 30 मे दिसा फांतोडेर 3 वरांच्या सुमाराक गणेशपुरी म्हापश्यां उदकाचे टांकये कुशीक जाल्लो. दुबावीत आरोपी थंय सोरो पियेत बशिल्ले. थंय दुचाकी वेल्यान मयत अहमद देवडी आनी संदेश साळकार (28, मयडें) हे थंय गेले. मयत देवडीचो दुबावीत आरके हाचे कडेन वैयक्तीक वाद आशिल्लो. हे तिडकींतल्यान दुबावितांनी ह्या वेल्या दोगांक लोखंडाच्या रॉडान मारपेट केली. ह्या हल्ल्यांत दोगूय गंभीर जखमी जाल्ले.
मयत अहमद देवडी हाचेर फाटले 20 दीस गोमॅकाँत उपचार सुरू आशिल्ले. मंगळारा 18 जून दिसा सकाळीं ताका उपचारा वेळार मरण आयलें.
मजगतीं, फरार दुबावीत आरोपी रामकृष्ण भालेकार उर्फ आरके हाका अटक जाय मेरेन अहमद देवडी हाची कूड ताब्यांत घेवची नात असो निर्णय मयताच्या कुटुंबान घेतला.
घडणुकेच्या दिसाच म्हापशें पुलिसांनी दुबावीत आरोपी मंथन राजू च्यारी (24, रा. घाटेश्वरनगर खोर्ली), श्रीधर शिवाजी किल्लेदार (26, रा. समतानगर खोर्ली) आनी अभिषेक रमेश पुजारी (20, रा. गंगानगर खोर्ली) हांकां जाल्यार 6 जून दिसा शरणबासू उर्फ चम्पी बुधाप्पा गायकवाड (27, रा. लक्ष्मीनगर म्हापशें, मूळ अक्कलकोट), नागराज उर्फ नागे दशरथ पुजारी (19, रा. पेडे म्हापशें, मूळ बेळगांवी) आनी बोरेश सतीश पुजारी (38, शेल्डेें-केपें, मूळ गोकाक) ह्या स जाणांक अटक केल्ली.
पुलिसांनी ह्या प्रकरणांत भा.दं.सं.च्या 120(बी), 307, 326, 506 (2) आनी 34 कलमा खाला गुन्यांव नोंद केल्लो. आतां पुलिसांनी तातूंत भा.दं.सं.चे 302 कलम जोडलां. फुडलो तपास पुलीस निरिक्षक निखील पालयेंकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
