भांगरभूंय | प्रतिनिधी
पणजीः मातये पसून गणपतीच्यो मूर्ती करपी ४११ कलाकारांनी अंदूं चवथी खातीर सबसीडी मेळोवपाक गोंय हस्तकला उदरगत म्हामंडळा कडेन अर्ज केल्यात. दर मुर्ते फाटल्यान कलाकारांक रु. २०० इतली सबसिडी मेळटली, अशी म्हायती म्हामंडळान दिल्या.
मातयेच्यो मूर्ती करपी कलाकारांक अंदूं अर्थीक मजतींत वाड करपाक वित्त खात्यान (खर्च) मान्यताय दिल्या. हे खातीर रु. १ कोटी इतली तजवीज वित्त खात्यान केल्या. पयलीं दर मुर्ते फाटल्यान कलाकारांक रु. १०० मेळटाले. आतां हातूंत वाड करून हे पयशे रु. २०० इतले केल्या. दरेक कलाकारांक फकत २५० मुर्त्यां खातीरूच ही सबसीडी मेळटली.
फक्त जे कलाकार म्हामंडळा कडेन नोंद आसात तेच हे सबसीडीक पात्र थारतले. नव्या कलाकारांक हाचो लाव घेवपाक मेळचो ना. कलाकारांचें नांव वळेरेंतल्यान काडून उडयतले तेन्नाच नव्या कलाकारांची नोंदणी जातली, अशी अट म्हामंडळान घातला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
