भांगरभूंय | प्रतिनिधी
गंडभैरांव मारुकूय व्हेल्यार रडटालो आनीक पोसूंकूय व्हेल्यार रडटालो! तागेली वृत्तीच तसली म्हूण आमी मुखार पावलं घालचें थारायलें. (आतां मुखार….)
दुसरे दीस सकाळीं गंडभैरांव सदा भशेन प्रायेर गेलो. तागेली तिडक खतखतत आशिल्ली. प्रायेर ताणें कांय तरनाट्या कडेन केस्तांव मांडिल्ले. गांवचे तरणाटे प्रायेर फुटबॉल खेळतासतना एकट्यान मारिल्लो शॉट एका भटक्या सुण्याचेर बशिल्लो. गंडभैरांव आपल्या सुण्याक घेऊन ते वटेन पासय मारतालो. ताणें खाड आनी पोनी ओडीत आपलें सुणेंपुराण ह्या भुरग्यांक आयकयलें. हे तरणाटे थोडेच गंडभैरावालें आयकतले!? तांणी ताका परत शापोदां सांगलीं, ताचेर झूडून गेले, गुरगुरले आनी तू परत हांगा येवनूच दाखय, अशी धमकी बी दिली. जीव आसल्यार भीक मागून खायत म्हूण गंडभैरांवान थंयच्यान फुज्ज्यो काडल्यो. खुबळिल्लो गंडभैरांव परत एकदां काचाबुल जाल्लो. तागेली निर्शेवणी तेंगशेर पाविल्ली. भिवन तो आठ- धा दीस घरांतलो भायर सरलोना. ताडीमोडीय ताका भायर सरूक दिनाशिल्ली. ताडीमोडीन म्हाल्याक घरा आपोवन गंडभैरावाले खाड-बोड तासून घेतिल्ले. खंयतरी गंडभैरावां वांगडा ताडीमोडीकूय बी कांच बशिल्लो. ताडीमोडी गंडभैरावाक समजावपाचो खूप यत्न करताली. पूण नळी फुंकली सोनारे, इकडून तिकडे गेले वारे, जातालें.
ह्या वटेन आमी तागेल्या ईमेलाक उत्तर बरोवन अंतिम मिनिट्स सगळ्या वांगड्यांक धाडून दिली. अंतिम मिनिट्स आमकां रजिस्ट्रार ऑफिसांक बी फायल करची आशिल्ली. तांचे कडल्यान फुडलें मार्गदर्शन बी घेवचें आशिल्लें. तोंडाक मास्क बांदून हांव आनी तीमण्णा चार माळयो चडून तांच्या ऑफिसांत गेल्ले. कोविडाच्या कारणा खातीर तांगेल्या ऑफिसचे दार अर्दें उक्तें आसताले आनी भितल्ल्या व्हटेन एक खुट मोडिल्ले मेज दवरून ताणीं ताचो आडामो केल्लो. मोडिल्ल्या खुटाक एक काळीच्च बडी बांदून आदार दिल्लो. मेजार एक काश दवरिल्ली. तिचेर वयर लायटीच्या वायरीक एक धवेंच्च कांशाचे तोंपरें लटकायिल्ले आनीक तांतूंक भितर एक शक्तिशाली बल्ब घाल्लो, जाचो फोक काशी भितर पडटालो. अशो फोक मारपी लायटी हांवे पयलीं कॅरमबोर्डाच्या वयर पळयिल्ल्यो. थंय म्हऱ्यांक गेल्यार पुसून हुनसाण जाणवताली आनीक घाम येतालो. गरम लायटींचो फोक ह्या भायल्यान आयिल्ल्या पेपराचेर घालून कोवीड जंतू ताजेर आसल्यार ते ह्या लायटींन मरू अशी तांची तजवीज आशिल्ली. प्रत्येक जाण आपल्या परेन कोविडाकडे लडटाले. आमका कांय हाची फाटभूंय खबर नाशिल्ल्यान आमी सरळ भितर वचपाचो यत्न केलो आनी थंयच्या पारेकारान आमका कोवीड न्हु रे, वचूं मेयणा म्हणत आडायले. कोविडा खातीर तांणी आम मनश्याक भितर धाडपाचें बंद केल्ले. जे पेपर हाडल्यांत ते काशीक घालप आनीक फुडल्या सोमनाक त्याच दिसा येवन पारेकारा कडल्यान पावती घेवप. म्हणजे ह्या सोमराचे फुडल्या सोमराक, शुक्राराचे फुडल्या शुक्राराक. भितर नदर मारपाचो यत्न केल्यार धुल्लच धुल्ल दिसतालो. सगळ्या ऑफिसांत एक सात- आठ लोक आमकां झळकल्ले. प्रत्येकाल्या मेजार दावे आनी उजवे कुशीन तीस- चाळीस धुल्लान भरिल्ल्यो फायली आनी मदीं काम करपी कर्मचाऱ्याचें खुमणे दिश्टी पडटालें. मास्का बांदिल्ल्यान वळखूय मेळनाशिल्ली. वळखीचो कोणीय दिसल्यार उलो मारून भितर सरपाचो यत्नूय करप शक्य जाय नाशिल्लें.
गंडभैरावांन ई- मेल घालून आमचेर “हल्ला बोल” पुकारिल्ले. आमचे पांय ओडपाक आपली जय्यत तयारी आसा अशेंच शिनाल ताणें आमकां दिल्लें. जबाबदारी घेतली म्हंटगेर, आमकां मुखार सरचेच आसलें आनी आमी फुडलें पावल उखलिल्लें. सुरवातेचीं कामां जीं आसतात, देखीक सोसायटी खातीर बँकेंत खाते उघडप, ऑफिस सेट अप करप, फायलीची सिस्टिम तयार करप हीं सगलीं कामां आमी उमेदीन केलीं. जसो घराचो कोर त्याच कोराची फायल अशी प्रत्येक घराक फायल हांवे तयार केल्ली. बाकीच्या विशयांचेर लागपीय फायली आमी तयार करून दवरिल्ल्यो. आमी दोग- तिगांयनीय बोल्सांतले दुडू उमेदीन खर्च केल्ले. तीमण्णान स्वखर्चान सोसायटीची वेबसायट बी तयार केल्ली. कोविडा कडेन टक्कर दित लायटी आनी उदक सोसायटीच्या नांवार करून घेवची आशिल्ली. सरकारी ऑफिसांत वचूंक आडखळी खूब येताल्यो. खुबशे खेपे कोवीड न्हु रे, सायब आयलो ना म्हणत आमकां परत धाडटाले. जमेची बाजू म्हळ्यार ह्या सगळ्या कामाक बिल्डरा कडल्यान लागपी सगले दुकुमेंत आमका कांय काचकिसांवां नासतना मेळटाले. सरकारी कार्यालयांनी भोंवून मात बरे- वायट अनुभव आमी घेताले.
लायटीच्या कार्यालया भितर आमकां अपेक्षे परस सुंदर अनुभव आयिल्लो. कोवीड आसताना पुसून इजनेरान आमगेली फायल कमीत कमी वेळा भीतर प्रोसेस केल्ली. शेवटाचे एकदा लायट आनीक उदक सोसायटी रेकॉर्ड वेळेंत आमी करून घेतिल्ले आनी तेंवूय कोविड काळांत. म्हाका याद झाली म्हगेले स्वतःचे रेकॉर्ड म्हज्या नांवार बदलपाक म्हाका वर्स मायज लागिल्ले. पूण ह्या वेळार आमी जीव तोडून सोसायटी खातीर फाटीं लागिल्ले. सोसायटी खातीर उदकाक लागपी प्रेस वेवसायीक दरावेल्यान घरगुती दराचेर येवन आमकां व्हड विसवं मेळिल्लो. ल्हानशी खबर पूण हातूंतल्यान आमकां खूब आनंद मेळिल्लो. परत एकदा आमी क्लब हावसाचेर सगळ्या वांगड्यांक आपयिल्ले आनी एक ल्हानशी इश्ट- कुटूर पार्टीय बी केली. फाटलीं कितलींशींच वर्सा पंचायतीचो वर्सुकी फोर फारीक केल्लो नाशिल्लो तो आमी कोरून घेतिल्लो. पंचायतीक रेकॉर्डस सोसायटी नावर करुंक फायल व्हरून दिली. जेन्ना आमका कळ्ळें की कॉमन लुगार सोसायटीच्या नांवार करप शक्य ना. तेन्ना हें कुवाडें कशें सोडोवचें हाजेर आमी बिल्डराल्या आदवोगादक मेळून चर्चा केल्यो. ताणें हें कलम चुकीचें हें मानलें आनी एक मेमोरँडम / रेक्टिफिकेशन अग्रीमेंट करपाचें तत्त्वता मान्य केलें.
आमकाय सोसायटी बाय लाॅवस, कायदे कानून हांचे विशीं चड ज्ञान नाशिल्ले, म्हूण आमकां योग्य वाट दाखोवपी कोण तरी जाय आशिल्लो आनीक रजिस्ट्रार ऑफिस आमकां ही वाट दाखोवंक शकता म्हूण आमी धीर सोडनास्तना परत परत वचून तांकां मेळपाचो यत्न करताले. कोविडाच्यो केशी मात्श्यो उण्यो जाल्ल्यो. हांव आनी तीमण्णा प्रत्येक मंगळाराक रजिस्ट्रार ऑफिसांत एक फावट मारताले, पारेकार आमकां आडामो दाखयत कोवीड न्हु रे म्हणून भितर सोडिनासतना परत धाडटालो.
ह्या एक मंगळाराक मात आमी पारेकारांची नदर चुकोवन वाटेर दवरिल्ल्या आडाम्याच्या मेजा खाचींतल्यान घश्टत भितर गेले. एकदाचें पावलं भितर मारतगेर मास्कां घालून बशिल्या स्टाफांन विचित्र नदर दित आमकां काॅपरेटीव्ह आॅफिसराक मेळपाक सांगलें. आॅफिसर संतबाबान आमकां सारकें मार्गदर्शन केलें. आमचें सगळें शंका निरसन ताणें बाय लाॅवस आनी कायदे दाखयत केलें. खूबशी स्पष्टीकरणा आमका ह्या बसकेतल्यान मेळिल्ली. आमका स्पेसिअल जनरल बॉडी मीटिंग घेवची आशिल्ली, आनी चडशे वांगडी भायर आशिल्ल्यान आमकां व्हिडिओ कॉन्फरन्सिंग मिटिंग करची आसली. आनी तशी आमी करूंक शकनात हेंवुय आमकां हे बसकेंतल्यान कळिल्लें. संतबाबाचे उपकार मानून आमी परत आयले आनी ही मीटिंग क्लब हाऊसा भीतर घेवपा खातीर नोटीस काडली (फुडें चलता…)
—
अजय करमली
93737 46957
हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
