भांगरभूंय | प्रतिनिधी
संतबाबाचे उपकार मानून आमी परत आयले आनी ही मीटिंग क्लब हाऊसा भीतर घेवपा खातीर नोटीस काडली. (आतां मुखार….)
स्पेशल जनरल बॉडी मीटिंग देसेंबरांच्या निमण्या आयताराक क्लब हावसांत घेवचे खातीर आमची तयारी जाल्ली. आमचे चडशे वांगडी, जे भायर आसतात ते नातलाचे सुटयेंक हांगा येतात, तेवूय आयताराचे मीटिंगेक वांटेकार जावंचे असो आमचो उद्देश आसलो. ताचे पयलीं आमी आमचे मॅनेजमेंट कमिटीचे मीटिंगेक नॉन ऑक्युपन्सी चार्जेस, हस्तांतरण चार्जेस, निमाणी तारीक जावन फी फारीक केल्या जाल्यार ताचेर फारीक करपाचो जुर वा मुल्त हाचेर थाराव पास केल्ले, ते जनरल बाॅडी कडल्यान मंजूर करून घेवपाचे आशिल्ले. ऑडिटर अॅपाँयट करचे आशिल्ले. बिल्डराले मेंटेनन्सचें कंत्राट थोड्याच म्हयन्यांत सोंपचे आशिल्लें आनी फुडें ते करपाची तांची इत्सा नाशिल्ली. आमचे कडे थोडेच म्हयने उरिल्ले. कोविडाचो भंय चलतां- भोंवतना जाणवतालो. तरी पूण, आमी बाकीच्या सोसायटीक भेट दिताले आनी कंत्राटदाराक आपोवूंक आनी मेळूंक सुरवात केल्ली. गार्डन, सेक्युरिटी खातीर लागपी सुचोवणी पत्रां आमी बरोवन एजन्सींकुय ई- मेल केल्लीं. त्या विशीं सगळ्या वांगड्यांक अद्यावत करचे आशिल्ले आनीक तांचे कडल्यान सुचोवण्यो आनीक मार्गदर्शन घेवचें आसले. सगळ्या वांगड्यांक पयलींच धाडिल्ले सोसायटी भितर पाळपाचे आनीक आचरणांत हाडपाचे आंतरिक नेम पास करून घेवचें आसले. सीसीटीव्ही बसोवचे बद्दल वांगड्यांचे विचार जाणून घेवचें आसले आनी हे सगले मुद्दे आमी अजेंडाचेर बरयिल्ले. एकूण मेळून आमी स्वतंत्रतायेन संकुलाची देखभाल करपाच्या वाटेन पावल उखलिल्लें.
एकदाचो देसेंबराचो निमणो आयतार उदेलो आनी आमगेली खाशेली जनरल बॉडी मीटिंग थारिल्ल्या वेळार चालू करपाक आमी हजर जाले. साता वयर हजेरी लागलीना. ना गंडभैरांव, ना ताडीमोडी ह्या मीटिंगेक आयिल्लीं, जरी ती दोगुय घरा कडेन आशिल्लीं. फाटीं रावून कुबांडां रचप दोगांयनीय पसंत केल्ले. बाय लाॅवस प्रमाण आनीक अर्धवर आमी वाट पळयली. थारिल्ल्या वेळा परस अर्धवर चड थांबून जे कितले वांगडी आसतात तोच कोरम धरतात, आनीक जे कितें कार्यवाय थंय चलता, जे कितें निर्णय थंय हाजीर आशिल्ल्यां मदीं भोवमतान पास जातात ते सगल्या वांगड्यांक बांदील आसतात. आमी मांडिल्ले सगळे प्रस्ताव हांगा साहजिकूच बिनविरोध पास झाले. वेण्णान नॉन ऑक्युपन्सी चार्जेस पास करुंक आढेवेढे घेतले, कारण तो दोन घरां ‘होम स्टे’ तत्वाचेर भाड्याक दितालो आनी त्या खातीर सामान्या परस हे चार्जेस चड अशें प्रस्तावां भितर आशिल्लें. होम स्टे भितर जोड साद्या भाड्या दिवचे परस खुबशे पटीन चड आसता हो ताचे फाटलो विचार आशिल्लो. पूण, थोडो तेंप वेण्णाल्या ह्या धंद्याक कोविडान मार दिल्लो. वेण्णा पिरंगलो. ‘कोवीड न्हु रे, धंद्याक मंदी आयल्या’ अशेंय ताणें म्हळे. घासाघीस जाली पूण थोडे चर्चे उपरांत हो थारावूय पास झालो.
सभेची मिनिट्स आमी सगळ्या वांगड्यांक धाडून कोणालोय आक्षेप वा कागाळी आसल्यार बरोवंक सांगलें. बाय लाॅवस प्रकार आठ दिसांचो टायम दिलो. गंडभैरांव आनी ताडीमोडी धरून कोणेच परत बरोवंक म्हणगेर अंतिम मिनिट्स आमी सगळ्या वांगड्यांक धाडून दिलीं आनी रजिस्ट्रार ऑफिसाक फायल बी केली. आनी आमी आमच्या मुखावेल्या कामाच्या फाटल्यान लागले. शेर सर्टिफिकेट दिवपाक लागपी दुकुमेंट, घराचे इस्क्रितूरां कॉपी सगळ्या मालकां कडल्यान मागोवंक आमी सुरवात केल्ली. बाय लाॅवस प्रमाण लागपी सगळीं फोर्मा आमी वंगड्यांक ई- मेल केलीं आनी तीं छापून सोसायटीच्या ऑफिसात बी उपलब्द करून दिली. धा- बारा वांगडी सोडले जाल्यार आमकां बाकीच्यांनी प्रतिसाद दिलो ना, दुकुमेंट धाडलें ना. घडयेक कोविडाचो भंय घेवन वांगडी घरा भायर सरपाची तयारी दाखयनाशिल्ले. विशेक दुकुमेंत एकठांय जातगेर सर्टिफिकेटा छापया, अशें आमी थारायिल्लें. येन्ना म्हळ्यार बाय लाॅवस पुस्तक वाचून म्हाकाय थोडे कायदे समजूपाक लागिल्ले.
आमका गार्डन पळोवपाक एक उमेदीचो कंत्राटदार सापडलो. पूण, सेक्युरिटी मेळूंक आमका खूप त्रास पडटालो. कोविडाच्या कारणां खातीर चडश्या एजन्सीचे कर्मचारी गांवांत गेल्ले. ह्या एजन्सीची हॉटेलांक सेक्युरिटी दिवपाचीं कामां कोविडा खातीर एकदम शुन्यार आयिल्लीं आनी धंदो उणो जाल्लो. ह्याच कारणा खातीर चडशे गार्ड तांणी परत धाडिल्ले. जीफॉरएस सारकिल्ल्यो व्हडल्यो एजन्सी सोडल्यार कोणूच मुखार येनाशिल्ले. धीर सोडिनासतना सोदीत रावतगेर एके एजन्सीन आमकां जुना साकुन सेक्युरिटी दिवचें मानून घेतले. ह्यो दोन मुखेल गोश्टी आमी साध्य केल्ल्यो. बिल्डरां कडेन वचून राणेसायबा कडे उलोवन पंढरी जो आमगेलो मॅनेजर आशिल्लो ताका दोन वर्सा आमचे वांगडा दवरपाक तत्त्वता मंजुरी करून घेतली. पंढरीक सगळे ह्या
सोसायटीचे/ संकुलाचे
भितर भायर खबर आशिल्ल्यान सुरवातीच्या काळांत तरी तो आमचे
बरोबर आसप आमकां
गरजेचें दिसतालें.
विचारमंथन करतां- करता आमकां लक्षांत आयलें की अर्थीक वर्स सोंपचे पयलीं थोडे दुडू काढून भांडवली खर्च करपाक राखीव फंड उबो केलो आनी एप्रिलाक फुडलीं वर्सुकी पटी जर काडली तर आमगेले टॅक्स वांचतले आनी सोसायटीचो राखीव निधी उबो जावपाक मदत जातली. हें सगळें करुंक जनरल बॉडीची मान्यताय लागता. ती घेवपाक आमचे कडे वेळ खूब उणो आसलो. हांव धरून आमी चडशे समितीचे वांगडी भोंवडेरूय आसलें. आमचे कडेन एकूच उपाय आसलो. हे पयशे उबे करपाची मागणी करपाची आनीक फुडल्या जनरल बॉडीक ताचें रॅटिफिकेशन म्हणजे मान्यताय घेवपाची. दोनीय अर्थीक वर्साचे मेळून पन्नास लाख मायज उबे करपाचे थारले. फेब्रेराच्या निमण्या सुमानाक आमी ई-मेल घालून सगळ्याक कळयलें. नाय जाल्यार बिल्डर आमकां वर्सुकी मेंटेनन्स पटी एकेकट्याक सव्वा लाख वयर घेतालो. सगळे ही पटी मुकाट्यान फारीक करताले. कारण खर्चुय तसोच आशिल्लो. थोडेशे दुडू मायज भरून दोन अर्थीक वर्साक जर वाटून घाल्यार आमचो राखीव निधीय उबो जातालो आनी फुडल्या अर्थीक वर्साक आमी टॅक्स मर्यादे भितर बी उरपाक शकताले, अशी आमची तजवीज आशिल्ली.
आनी ह्या वेळार गंडभैरांव आडमेळीं हाडपाक उबो जालो. हांगां गंडभैरावांक हल्लो करूंक संद सांपडली. कारस्थानाची सुरवात हांगासल्ल्यान जाल्ली. वांगड्यांक फोन करून, मॅसेज आनीक रकाद धाडून ताणें भडकावपाक सुरवात केली. आमी जें कितें करतात तें सगळें चूक हें तो सांगतालो. जनरल बॉडी मान्यताय नासतना आमी हे पयशे उबारूंक शकनात अशें ताणें आनी हो फौजदारी गुन्यांव म्हुणपाचो आरोप तो आमचेर करीत वांगड्यांक भडकायतालो. जगांट वाजयत पेरंगांव घालूक लागिल्लो जणू काय आमी हे पयशे आमच्या खात्यात घेवन खातले अशी करंदाय तो मारूंक लागिल्लो. आमी चारूय वांगडी तेन्ना संकुलांत नाशिल्ले. आमचे पांचवे वांगडेक हाचो वास लागलो आनी तिणें आमकां मॅसेज धाडली. म्हारु गोमटेर बशिल्या भशेन तागेली वागणूक जाल्या, हें कळना फुडें हांवें रोखडोच वाड्या वेल्या गुरवाक आयताराक सांजेर कश्याय भशेन यो, असो रकाद सालू कडल्यान धाडलो.
(फुडें चलता…)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
