भांगरभूंय | प्रतिनिधी
राजस्थान पोस्को न्यायालयाचो निर्णय
शाहपुरा, खबरां संस्था: राजस्थानांत शाहपुरा जिल्ह्यांतल्या कोटरी हांगा १४ वर्सां पिरायेचे चलयेचेर सामुहीक बलात्कार करून तिका जिवें जळयल्ल्यांक फांशयेची ख्यास्त दिली. ह्या प्रकरणांत भिलवाडो पॉक्सो कोर्ट-२ न सोमारा आपलो निर्णय दिलो. जातूंत कालू आनी कान्हा ह्या दोनूय दोशींक फाशयेची शिक्षा आयकयल्या. न्यायाधीशांनी हें प्रकरण दुर्मिळांतलें दुर्मीळ मानलें.
आदीं शेनवारा, १८ मेक भिलवाडो पॉक्सो कोर्टान कालू आनी कान्हा हांकां दोशी थारायल्ले. जाल्यार सात आरोपींची निर्दोश सुटका केल्ली. न्यायालयान सोमारा मेरेन निर्णय राखून दवरिल्लो.
मात काल जाल्ले सुनावणे वेळार पिडेस्ताचीं आवय-बापूय न्यायालयांत हाजीर आशिल्लीं. निकाल आयकून पिडेस्ताचे आवयन सांगलें, आयज आमकां न्याय मेळ्ळो. निर्दोश सुटिल्ल्या सात आरोपीं मदीं दोगूय आरोप्यांच्यो घरकान्नी, आवय, भयण आनी हेरांचो आसपाव आसा.
कालू आनी कान्हा हे दोगूय पुलिसांच्या ताब्यांत आसात. त्या दोगांयनी एके १४ वर्सां पिरायेचे चलयेचेर अत्त्याचार केले आनी उपरांत तिका भट्टेंत घालून जिवें जळयलें. ते दोगूय सद्या पुलिसांचे तावडेंत आसात. हे विशीं सरकारी वकील महावीर किसनावत हांणी, फाटल्या वर्सा ऑगस्टांत सामुहीक बलात्कारा उपरांत नेण्टे चलयेक कोळशाचे भट्टेंत घालून हुलपायलें. हे विशीं पुलिसांनी म्हयन्या भरांत ४७३ पानांचें आरोपपत्र दाखल केल्लें.
महावीर किसनावत हांणी, दोगूय दोशींक फाशी दिवपाची मागणी जायत आशिल्ली. आरोपी कालून तिचेर दोन फावटीं बलात्कार केल्लो. तिका मारबडय केल्या उपरांत तिका मरण आयिल्ल्याचें समजून भट्टीत हुलपयलें.
मजगतीं, ही घडणूक २ ऑगस्ट २०२३ दिसा घडली. शहापुरच्या कोटरी पुलीस स्टेशन हद्दींतल्या एका गांवांतली चली सकाळच्या सुमार ८-९ वरांचेर गोरवां चरोवपाक घेवन गेल्ली. कालू आनी कान्हा ह्या दोगांय भावांनी तिका व्हरून वट्ट चार वरां तिचेर बलात्कार केलो. त्या दोगांच्यो घरकान्नी, आवय, भयणीक हें कळ्ळ्या उपरांत त्या सगळ्यांनी मेळून हाचेर चर्चा केली. उपरांत ते नेण्टे चलयेक भट्टेंत व्हरून जळयलें.
पोस्को न्यायालयान वट्ट ९ मदल्या ७ आरोपींची निर्दोश सुटका केली. कालू आनी कान्हा हांकां दोशी घोशीत केले.
ज्या शेतांत बलात्कार जाल्लो तें शेत पिडेस्ताच्या बापायचें जावन आसा. हें शेत पिडेस्ताच्या घरा पसून देड किलोमिटराच्या अंतराचेर आसा. हांगा कोळसो करपाच्यो पांच भट्ट्यो आसात. घडणुकेच्या चार म्हयन्यां पयलीं पिडेस्ताच्या बापायन ह्यो भट्ट्यो आरोपींक भाड्याक दिल्ल्यो. चार म्हयन्यां सावन हांगा कोळसो करपाचें काम सुरू आशिल्लें. हांगा काम करपी पिडेस्ताच्या घरा सेगीत यो-वच करताले. ताका लागून आरोपी त्या कुटुंबाक बरे वळखताले.
आमी सदांच वांगडाच गोरवां चरोवपाक वतालीं, मात ते दीस….
हे घडणुके उपरांत पिडेस्ताचे बापायन सांगलें, तांची चली केन्नाच घराभायर एकटी वचनाशिल्ली. आपूण, तिची आवय आनी आपली धूव आमी सदांच गोरवां चरोवपाक वांगडा वतालीं. आपली धूव केन्नाय एकटीच वतां अशें म्हणल्यार आवय तिका सोडिनाशिल्ली. तीय वांगडा तिच्या वताली. २ ऑगस्ट २०२३ दिसा कुटुंबांत वाद जालो. नात्यांतलो हो वाद मिटोवपा खातीर आमी थंय वचप गरजेचें आशिल्लें. ताका लागून आमी थंय गेलीं. आपली धूव घरा एकटीच आशिल्ली म्हणून तिणें गोरवांक घेवन वचपाचें थारायलें. सकाळीं ८ ते ९ मजगतीं ती गोरवांक घेवन गेली ती परत घरा येवंकूच ना.
पिडेस्ताचे आवयन सांगलें, आपली धूव दनपरां ३ वरां मेरेन घरा येवंक नाशिल्ल्यान आपूण तिका सोदपाक शेतांत गेलीं. तेन्ना शेतांत भट्टी जळनाशिल्ली. तेन्ना हांवें आरोपींक आपली धूव खंय आसा अशें विचारलें तेन्ना ते ओगीच रावले. सांजेवेळार गांवच्या लोकांक सांगले उपरांत तांणीय तिका सोदपाक सुरवात केली. ह्या वेळार ते परत शेतांत गेले तेन्ना भट्टी जळटाली. हें पळोवन गांवच्या लोकांनी आनी घरच्यांक धक्को बसलो. सकाळी भट्टी जळनाशिल्ली आनी पावसूय पडटालो. रातची अचकीत भट्टी जळपाक लागली आनी तांणी कामगारांची खर चवकशी केली. मजगतीं कोणेंतरी सांगलें, चलयेचो बूट थंय पडला म्हणून. उपरांत आरोपींच्या लक्षांत आयलें हें प्रकरण मुखार आयलें म्हणून. उपरांत तांणी चलयेचेर बलात्कार करून तिका हुलपयल्ल्याचें सांगलें.
चवकशी केल्या उपरांत, आरोपींनी चलयेचो एक हात कापून, तो भट्टेंत जळोवन ताची कूड तळ्यांत उडयल्ल्याचें उक्ताडार आयलें. हें भट्टेंच चलयेचीं चांदीचीं काकणां, हाडां सयत हाताचो कांय भागूय सांपडलो.
हे घडणुके उपरांत ३ ऑगस्टाक फॉरेन्सीक टिमीक (एफएसएल) घडणुके सुवातेर व्हेले. तेन्ना टिमच्या वांगड्यांनी भट्टींतल्यान ३०० किलो परस चड गोबोर आनी कोळसो भायर काडलो. ते फिल्टर केल्या उपरांत दरेका कोळशाची ६ वरां वर्गवारी केली. चलयेच्या हाताचे कुडके सांपडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
