भांगरभूंय | प्रतिनिधी
म्हापशें ः प्रायमवाडो, खोर्जुर्वेंच्या फिलीप वाझ हांच्या घराक शॉर्ट सर्कीटाक लागून उजो लागलो. हे घडणुकेंत रांदचे कुडींतलें सामान लासून गोबोर जालें. हातूंत तांकां सुमार ५ लाखांचें लुकसाण जालें. मंगळारा सकाळच्या सुमार ११ वरांचेर ही घडणूक घडली.
वॉटर मोटार पंपांत शॉर्ट सर्कीट जावन हो उजो लागलो. उज्यांत रांदचे कुडींतलो फ्रीज, वॉशींग मशीन आनी घरांतलें हेर सामान लासलें. तशेंच नळ्यांच्या पांख्याचें लुकसाण जालें. हें सगलें मेळून ताचें सुमार ५ लाखांचें लुकसाण जालें.
हे घडणुकेची म्हायती मेळटांच म्हापशें उजो पालोवपी दळाचे उपअधिकारी ज्ञानेश्वर सावंत हांच्या नेतृत्वा खाला जवानांनी घडणुके सुवातेर वचून उजो नियंत्रणांत हाडलो. हाका लागून घराचो व्हड भाग उजो लागपा पसून वाटवलो. म्हापशें पुलिसांनी येवन घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
