भांगरभूंय | प्रतिनिधी
भांगरभूंय । प्रतिनिधी
फोंडेंः तामसडो- धारबांदोडें हांगच्यान खैरीच्या लाकड्यांची चोरी चोरी प्रकरणांत कुळें रानां विभागान 11 जाणांक अटक केली. दोन वाहनां सयत एक कटर, एक ऍर पिस्तूल, 4 लाखांची रोकड, भांगराच्यो दोन मुदयो आनी एक सरपळी रानां अधिकाऱ्यान जप्त केल्या.
ह्या चोरी प्रकरणांतलो मुखेल सूत्रधार संदेश सूर्यकांत नायक हाका हाचे पयलीं खैरीच्या लांकड्याचे चोरी प्रकरणांत पेडणे, फोंडें आनी केरी हांगच्या रानां अधिकाऱ्यांनी अटक केल्ली. जप्त केल्ल्या खैरीचे मोल सुमार एक लाख रुपया आसा. कुळें राना विभागाचो अधिकारी नारायण प्रभुदेसाय हांच्या मार्गदर्शना खाला अटकेची ही कारवाय केली. ह्या प्रकरणांत कांय थळाव्या लोकांचो आसपाव आसपाचो दुबाव थळावे लोक उक्तायतात.
सोमाराक सांजे 6.30 च्या सुमाराक राना कर्मचाऱ्यांनी तामसडो हांगा गेल्ले तेन्ना तांकां जीए 04 सी 3296 ह्या नंबराचें सुमो गाडयेंत खैरीची कापल्लीं लाकडां भरतात हें दिसलें. सुमार सात कामगार हें काम करताले. रानां अधिकाऱ्यांनी तांकां ताब्यांत घेवन चवकशी केली तेन्ना ह्या प्रकरणालो संदेश नायक सूत्रधार आशिल्ल्याचें स्पश्ट जालें. नारायण प्रभुदेसाय हाणे ताका मोबायलाचेर फोन करून खैरी भरल्ली सुमो सुरू जायना अशें सांगलें. ताका लागून तो आनी हेर तिग जाण रातीं 12.30च्या सुमाराक जीए 01 आर 7387 ह्या स्कॉर्पिओ गाडयेन धारबांदोडें पंचायत ऑफिसा कडेन आयले आनी तांकां प्रभुदेसायान अटक केली. सुमो गाडयेचो नंबर बोगस आशिल्लो.
अटक केल्ल्यां मदीं मारुती कात्रोत , विठ्ठल धाकलु पाटकरे, जानू शामु पाटकरे , मांबू बाबू पाटकरे , लक्ष्मण साहू पाटकरे, संदीप बाबू जंगले , रामू सोनू पाटकरे, योगेश दोंडू पाटकरे (सगळे यल्लापुर – कर्नाटक), सैफ शेख (मोर्ले – सत्तरी), असिफ अश्रफ शेख (, केरी – सत्तरी) आनी संदेश सूर्यकांत नायक ( मूळ सावंतवाडी रावपी पर्ये) हांचो आसपाव आसा स्कॉर्पिओत रोख 4 लाख, कटर, ऍर पिस्तूल भागरा मुदयो आनी सरपळी आशिल्ली.
संदेश नायकाक हाचे पयलीं खैरी प्रकरणांत अटक केल्ली. तशेंच जप्त केल्ली सुमो हाचेय पयलीं रानां अधिकाऱ्यांनी तस्करी प्रकरणात अटक केल्ली. तिच्या फुडें जीए 05 टी 0595 आनी फाटल्यान जीए 04 सी 3296 ही नंबर प्लेट आशिल्ली. खैरीच्या लांकडाची येरादारी जातली अशी खबर आमकां मेळल्ली अशें नारायण प्रभुदेसायान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
