खेळां पत्रकारिता: आवड, अभ्यास आनी संद

भांगरभूंय | प्रतिनिधी

प्रसार माध्यम – 11

प्रत्यक्ष मैदानाचेर रिपोर्टिंग करतना फकत निकाल बरोवं नाकात. मॅचीचो टर्निंग पॉयट, उत्कृश्ट खेळी, प्रेक्षकांचो प्रतिसाद, प्रशिक्षक आनी खेळगड्यांची प्रतिक्रिया…..

क्रिकेट, फुटबॉल, बॅडमिंटन, कबड्डी, अ‍ॅथलेटिक्स वा हेर खंयच्याय खेळा विशीं आवड आसत जाल्यार खेळां पत्रकारिता हें एक आकर्शक करियर थारूं येता. आयच्या डिजिटल युगांत खेळां पत्रकारांक फकत मॅचीचो निकाल सांगप पुरोशें ना, तर खेळगड्यांची कामगिरी, रणनीती, विक्रम, वादविवाद आनी पड्ड्या फाटल्या घडामोडींचेय विश्लेशण करचें पडटा.

येसस्वी खेळां पत्रकार जावपा खातीर खेळाचें खोलायेन ज्ञान, निरीक्षण शक्त, लेखन कुशळटाय आनी अचूक म्हायती दिवपाची संवय गरजेची. मॅच पळयतना म्हत्वाच्यो घडणुको टिपप, आंकडेवारी लक्षांत दवरप आनी तें वाचप्यांक सोंपे भाशेंत विश्लेशण करून सांगप हें म्हत्वाचें कौशल्य. इंग्लीश भाशेचें ज्ञानूय उपेगी थारता, कारण चडशे अधिकृत खेळां म्हायतीचे स्रोत इंग्लीशींत आसात.

संपर्काक म्हत्व

खेळां पत्रकारितेंत संपर्काक व्हड म्हत्व आसा. थळाव्यो खेळां संघटना, प्रशिक्षक, खेळगडे, पंच, खेळां अधिकारी आनी सर्तींचे आयोजक हांच्या वांगडा बरे संबंद आसल्यार विशेश खबरो घरांत बसून मेळूं शकतात. मात मॅच प्रत्यक्ष पळोवपाक गेल्यार बरें. तालुको, जिल्हो खेळां अधिकारी कार्यालय, पीटी शिक्षक, शालेय आनी महाविद्यालयीन सर्ती, थळावे क्लब आनी खेळां संघटना ही म्हायतेचीं म्हत्वाचीं केंद्रां आसात.

डिजीटल गरजेचें

गांवांत वा ल्हान शारांत रावनूय खेळां पत्रकार म्हणून येस मेळोवंक येता. जायते राश्ट्रीय खेळगडे ग्रामीण भागांतल्यान फुडें आयल्यात. थळाव्या सर्ती सावन सुरवात करून डिजिटल माध्यमां, सोशल मीडिया आनी वेबसायटच्या आदारान राश्ट्रीय पांवड्यार पावप आयज शक्य जालां. राश्ट्रीय आनी आंतरराश्ट्रीय खेळां खबरांसाठी ESPN Cricinfo, SportsStar, Olympics, BWF (बॅडमिंटन), FIFA, ICC आनी Sportskeeda सारक्या वेबसायटींचो नेमान अभ्यास करप गरजेचें. क्रिकइन्फोचेर थळाव्यो खबरो पसून मेळटात. 

प्रभावी कशें बरोवप?

प्रत्यक्ष मैदानाचेर रिपोर्टिंग करतना फकत निकाल बरोवं नाकात. मॅचीचो टर्निंग पॉयट, उत्कृश्ट खेळी, प्रेक्षकांचो प्रतिसाद, प्रशिक्षक आनी खेळगड्यांची प्रतिक्रिया, विक्रम, दुखापती आनी मॅची उपरांतची पत्रकार परिशद हांची म्हायती एकठांय करची. फोटो आनी ल्हान व्हिडिओ घेतल्यार बातमी चड प्रभावी जाता.

कार्यालयांत बसूनूय खेळां पत्रकारिता करपाक येता. जायते पत्रकार टिव्ही, अधिकृत वेबसायटी, आकडेवारी आनी ऑनलायन पत्रकार परिशदांच्या आदारान बरप करतात. पूण मैदाना वयलो प्रत्यक्ष अणभवाक पर्याय ना. फोटोग्राफीचें मूळ ज्ञान आसल्यार फायदो जाता, पूण दरेका पत्रकाराक वेवसायिक फोटोग्राफर आसपाची गरज ना.

खेळां पत्रकारितेत येस मेळोवपा खातीर खेळा वयलो मोग, सातत्यान वाचन, अचूकताय आनी मैदाना कडेन सतत जोडिल्ले रावप, हेंच खरें येसाचें सूत्र आसा. खेळगडे, खेळां सर्तींचे आयोजक, पीटी शिक्षक हांचे कडेन सतत संपर्क आसप बरें.

खेळगडे मैदानाचेर इतिहास घडयतात; खेळां पत्रकार तो इतिहास समाजा मेरेन पावयतात.

डिजीटल संदी

आज खेळां पत्रकारिता ही फकत खबरांपत्रा पुरती मर्यादित उरिल्ली ना. टिव्ही, यूट्यूब, वेबसायटी, पॉडकास्ट, मासिकां, सोशल मिडीया आनी डिजिटल प्लॅटफॉर्मांक लागून संदी व्हड प्रमाणांत वाडल्यात. काॅमेंट्री वा म्हायती बी दिवपाची आसल्यार पत्रकारांचें निरीक्षण, तांणी बरयिल्लें वाच्चें. देखीक क्रिकेट समालोचक हर्ष भोगले, अयाज मेनन (क्रिकेट लेखक), बोरिया मुजुमदार (खेळां इतिहास जाणकार, निखील नाज (टिव्ही पत्रकार), विक्रम गुप्ता (क्रिकेट आनी खेळां चर्चा), रोहित जुगलन (खेळां रिपोर्टर), हेमंत जोगदेव, विजय लोकपल्ली अशें कितलेशेच पत्रकार आसात. तांचीं पुस्तकां वाच्चीं. 

आयज जायत्या खबरां वाहिन्यांनी स्वतंत्र खेळां विभाग आसता. मॅच सुरू आसतना मैदाना वयल्यान थेट रिपोर्टिंग, स्टुडिओ विश्लेशण, खेळगड्यांच्यो मुलाखती आनी विशेश कार्यक्रमां खातीर खेळां पत्रकारांची गरज आसता. खेळां विशयक मासिकां, संकेतस्थळां आनी डिजिटल पोर्टलांनीय लेखनाची व्हड संदी आसतात. मॅच विश्लेशण, खेळगड्यांची चरित्रां, ऑलिम्पिक, विश्वचशक, थळावे खेळ, फिटनेस आनी खेळां वेवस्थापन सारक्या विशयांचेर लेख बरोवं येतात.

लेखना खातीर कितें करचें?

०. दर दिसा उण्यांत उणी एक तरी खेळां बातमी आनी एक विश्लेशणात्मक लेख वाचात.

०. स्कोअरकार्ड वाचपाची आनी आंकडेवारी समजून घेवपाची संवय लायात.

०. थळाव्या सर्तींचें रिपोर्ट बरोवपाक सुरवात करात.

०. स्वताचो ब्लॉग, फेसबुक पेज वा यूट्यूब चॅनेल सुरू करात.

०. जिल्हो आनी राज्य पांवड्या वयल्या सर्तींक उपस्थित रावात.

०. खेळगडे, प्रशिक्षक आनी आयोजकांची ल्हान मुलाखत घेवपाचो सराव करात.

०. व्हिडियो शूटिंग, मोबायल पत्रकारिता आनी सोशल मीडिया पोस्टिंगाचीं मूळ कौशल्यां आत्मसात करा.

०. इंग्लिशींतलें खेळां साहित्य आनी अधिकृत अहवाल वाचपाची सवय दवरात.

विशेश म्हणजे, गोंय वा कोंकणा सारक्या भागांत खेळां पत्रकारितेक बरी संदी आसा. फुटबॉल, कबड्डी, क्रिकेट, अ‍ॅथलेटिक्स, उदका खेळ आनी पारंपारिक खेळांचेर सातत्यान बरप केल्यार राश्ट्रीय माध्यमांचेंय लक्ष ओडून घेवपाक येता. जायते व्हड खेळां पत्रकार थळाव्या सर्तींच्या ल्हान खबरांक लागूनच फुडें आयल्यात. तुमच्या गांवांनी, शाळांनी विवीध खेळांच्यो सर्ती जातात, तांचे 1- 2 फोटो आनी मुद्देसूद बातमी दिवन सुरवात करची. 

– सत्यवान