भांगरभूंय | प्रतिनिधी
भांगरभूंय । प्रतिनिधी
काणकोणः खेळगड्यांनी आपलीं सपना पुराय जिद्दीन पुराय करपाक जाय. अपेशाची भिरांत बाळगुवपाक जायना. तुमच्या येसा खातीर यत्न करपी पालक, भावंडा आनी शिक्षकांचे सदांच उपकारी रावपाक जाय अशें आंतरराष्ट्रीय बॅडमिंटन खेळगडी अनुरा प्रभुदेसाय हिणे सांगलें. लोलयेंच्या श्री दामोदर विद्यालयाच्या वर्सुकी रथसप्तम कार्यावळ आनी इनाम भेटवण कार्यावळींत मुखेल सोयरी म्हणून तें उलयतालें.
ह्या वेळार माचयेर कार्यावळीचे अध्यक्ष म्हणून युनियन बँकेच्या लोलयें फांट्याचो वेवस्थापक प्रियांशू सेन, मुख्याध्यापक जितेंद्र आमशेकार, वेवस्थापक रामकृष्ण नायक, दामोदर विद्याप्रसारक संस्थेचो सचीव संजय भट पिंगे आनी पालक- शिक्षक संघाची अध्यक्ष अंजली तळेकार माचयेर आशिल्ली. विद्यार्थ्यांनी म्हणल्ल्या येवकार गीतान कार्यावळीक सुरवात जाली. जितेंद्र आमशेकारान प्रास्तावीक करून सोयऱ्यांची वळख करून दिली. दामोदर विद्यालयाची आदली विद्यार्थिनी नेहा कोळेकार हिची 37 व्या राष्ट्रीय खेळां सर्तींत मिनी गोल्फ सर्ती खातीर जाल्ले निवडी खातीर तिका यादस्तीक दिवंन भोवमानीत केलें.
मानेस्तांचे हस्तुकीं विद्यालयाचें हातबरप “नंदादीप” हाचें प्रकाशन जालें. विद्यालयान घेतिल्ल्या सर्तींत जैत मेळयल्ल्या विद्यार्थ्यांक इनामां भेटयलीं. पांचवी तें सातवी यत्तेच्या गटांतलो बरो खेळगडो म्हणून देवानंत खुशाली वेळीप आनी सारिका सुभाष गांवकार, आठवी तें धावे यत्तेच्या गटांतल्या अक्षय अर्जुन वेळीप आनी श्रेया संजय वेळीप हांकां पदकां दिवंन भोवमानीत केलें. उत्कृश्ट समाजसेवा इनाम रोहीत विठ्ठल कोंकरे हिका वक्ता म्हणून गौरी यादव गांवकार हांकां इनामां दिलीं. ज्युनिरय रेड क्रॉस कॅडेट म्हणून प्रणाली मोलू वेळीप आनी चेनत चंद्रकांत वेळीप हांचो भोवमान केलो. कार्यावळीचें सूत्रसंचालन रजनी डिसोझान केलें. जैतिवंत विद्यार्थांची नांवा कीर्ती सातार्डेकार आनी खेळा अहवालाचें वाचन रेखा पागीन केले. अनिल कामत हाणे निमाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
