भांगरभूंय | प्रतिनिधी
पणजी, प्रतिनिधी : फाटोफाट पांच लोकसभा वेंचणुको जिखले उपरांत हे खेप भाजपान परत केंद्रीय मंत्री श्रीपाद नायक हांकां उत्तर गोंयची उमेदवारी दिल्या. तातूंत जैत मेळळे जाल्यार आदले केंद्रीय मंत्री एदुआर्द फालेरो हांचो विक्रम श्रीपाद नायक मोडटले. फालेरो हांणी 1977, 1980, 1984, 1989 आनी 1991 अशो पांच लोकसभा वेंचणुको काँग्रेसीचे उमेदवारीचेर जिखल्यात. 1996 च्या लोकसभा वेंचणुकेंत युजीडीपी वतीन चर्चील आलेमांव हांणी तांचो पराभव केल्लो. हाचे उपरांत फालेरो हांणी परत वेंचणूक लढोवंक ना. श्रीपाद नायक हांणी उत्तर गोंयांतल्यान 1999, 2004, 2009, 2014 आनी 2019 अशो सेगीत पांच लोकसभा वेंचणुको जिखल्यात. हे खेपो जैत मेळ्ळें जाल्यार फालेरो हांचो सेगीत 5 जैतांचो विक्रम श्रीपाद नायक मोडटले.
सर्गेस्त इंद्रजित गुप्ता (11), अटलबिहारी वाजपेयी (10), सोमनाथ चटर्जी (10), पी. एम. सइद (10) हे चड खेपो लोकसभेचेर वेंचून आयल्यात. सध्याचे लोकसभेंत समाजवादी पक्षाचे शफिकर रेहमान बर्क हे सगल्यांत ज्येश्ठ खासदार आसात. ते 9 खेपो वेंचून आयल्यात. भाजपान उमेदवारांची पयली वळेरी जाहीर केल्या. हेर पक्षांचे उमेदवार जाहीर जावपाचे आसात. जिखून आयले जाल्यार फुडले लोकसभेंत श्रीपाद नायक हे भाजपाचे सगळ्यात ज्येश्ठ खासदार थारपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
