भांगरभूंय | प्रतिनिधी
नवी दिल्ली, खबरां संस्था : सोमारा १८ वे लोकसभेचें अधिवेशन सुरू जालां. प्रधानमंत्री नरेंद्र मोदी सयत सगल्यांनी खासदार म्हूण सोपूत घेतलो. लोकसभेची कार्यवाही सुरू जाले उपरांत प्रोटेम स्पीकर भर्तृहरी मेहताब हांणी लोकसभेचे वांगडी म्हूण खासदारांक सोपूत दिलो. सभाघराचे फुडारी प्रधानमंत्री नरेंद्र मोदी हांणी सगळ्यांत पयलीं सोपूत घेतलो. कॉंग्रेसीचे खासदार कोडीकुन्नील सुरेश हांचें नांव घेतलें मात ते सभाघरांत हाजीर नाशिल्ले. उपरांत हेर खासदारांनी सोपूत घेतलो. सोपूत घेतले उपरांतूच खासदार लोकसभेचे अधिकृत वांगडी जातात. ते उपरांत खासदारांक सरकारी सुविधा मेळपाक लागतात. खासदारांचो खाशेल्या लोकां मदीं आसपाव जाता. सरकारा कडल्यान तांकां जायत्यो फुकट सुविधा मेळटात.
सरकारी बंगलो
खासदारांक दिल्लींत बंगलो दितात. दुसरे वा तिसरे खेपे सभाघरांत वेंचून आयिल्ले पोरणे खासदार आपलो राबितो बदलनात. हेर सगल्या नव्या खासदारांक नवी दिल्ली वाठारांत सरकारा वतीन रावपाची वेवस्था आसा. रांदपी, सुरक्षा रक्षक अशो सगळ्यो सुविधायो ह्या बंगल्यांत आसात. खासदारांचींय कार्यालयां तांच्या राबित्यांत आसतात. थंयच्यान ते काम पळयतात. खासदारांक कुटुंबा सयत ह्या घरांत रावपाक मेळटा.
पगार आनी पेन्शन
एकदां खासदार म्हूण सोपूत घेतकच तांचो कार्यकाळ सुरू जाता. सोपूत घेतले बरोबर खासदारांक पगार मेळटा. खासदारांक म्हयन्याक एक लाख रुपया पगार मेळटा. हाचे भायर दिसाक २००० रुपया अतिरिक्त भत्तो. हेर खर्चा खातीर २० हजार रुपया, स्टेशनरी खातीर ४ हजार रुपया, पत्रां खातीर २ हजार रुपया भत्तो आसता. एकंदरीत एका खासदाराक पगार म्हणून एक लाख, मतदारसंघ भत्तो म्हणून सुमार ७० हजार रुपया, कार्यालयीन खर्च आनी दिसपट्टो भत्तो म्हणून सुमार ६० हजार रुपया मेळटात. हाचे वांगडाच खासदारांक निवृत्ती उपरांत बरी पेन्शनय मेळटा.
फुकट प्रवास आनी टोल
खासदार जाले उपरांत तांकां विमान, रेल्वे आनी रस्त्या वयल्यान प्रवास करपा खातीर फुकट प्रवास पास दितात. जो तांकां सरकारी आनी वैयक्तीक कामां खातीर वापरूं येता. खासदारांक रस्त्यावेल्या प्रवासांत फुकट प्रवासाची सुविधा दितात. टोल सुटपा खातीर दोन फास्टॅग दितात. दिल्लींत सरकारी कामां खातीर खासदारांक वाहन सुविधा दितात.
फुकट टेलिफोन आनी इंटरनेट
खासदारांक फुकट टेलिफोन आनी इंटरनेट सुविधाय दितात. तांच्या वाठारांत आनी देशभरांत संवाद सादपा खातीर ही सुविधा दिता.
फुकट उपचार
खासदारांक आनी तांच्या कुटुंबांक सरकारी हॉस्पिटलांत फुकट वैजकी सुविधा दितात. एम्स आनी सफदरजंग हॉस्पिटल ह्या सारक्या नामनेच्या सरकारी हॉस्पिटलांनीय ही सुविधा आसा. खासदाराक खाजगी हॉस्पिटलांत धाडल्यार उपचाराचो सगळो खर्च सरकार करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
