भांगरभूंय | प्रतिनिधी
मुख्यमंत्री: बस तिकिटांत मेळटली सवलत
पणजी : खासगी वाठारांतल्या कामगारां खातीर घरनिर्माण येवजणे सयत सरकार उण्यात उण्या पगारांत लेगीत वाड करतलें. कदंबा तशेंच म्हजी बस येवजणेच्या तिकिटांत सवलत दिवपा सयत शिक्षणीक शिश्यवृत्ती लेगीत सुरू करतले, अशें मुख्यमंत्री डॉ. प्रमोद सावंत हांणी सांगलें.
नोकरी करता आसतनाच कर्मचार्यांक शिकपाची संद मेळची म्हूण २ ते ३ विद्यापिठांकडेन सरकार कबलात करतलें, अशें तांणी सांगलें.
ताळगांव डॉ. श्यामाप्रसाद मुखर्जी स्टेडियमाचेर आयज रोजगार मेळावो जालो. रोजगार मेळाव्याच्या उक्तावणाक ते उलयातले. ह्या वेळार कामगार मंत्री बाबुश मोन्सेरात, मजूर संचालक राजेश माजगांवकार आनी हेर मानेस्त हाजीर आशिल्ले.
आयच्या रोजगार मेळ्याक १५० कंपन्यो वाटेकार जाल्यात. हातूंतल्यान ५ हजार जाणांक रोजगार संद उपलब्ध जावप शक्य आसा. हॅल्थकेर, आयटी, हॉस्पिटेलिटी, बँकींग, एविएशन, टेलेकॉम हे वाठारातल्यो कंपन्यो रोजगार मेळ्यांत वाटेकार जाल्यात. बारावी, पद्वीधर हांकां व्हायट कॉलर जॉब्स दिवरपाचे यत्न आसात. आयज पद्वी वा पद्वीका मेरेनचें शिक्षण नोकरे खातीर पुराय थारचें ना. पद्वी मेळयली तरी दर एकल्यान स्किलिंग, अप स्किलिंग जावपाची गरज आसा. आयटीआय तशेंच हेर संस्थानी कुशळटाय अभ्यासक्रम उपलब्ध आसात. नोकरी मेळ्ळ्या उपरांत लेगीत दर एकल्यान दुरुस्त शिक्षण वा हेर माध्यमांतल्यान शिकत रावपाची गरज आसा. दिर्घ काळाचो विचार केलो जाल्यार हाका लागून नव्यो संदी उपलब्ध जावप शक्य आसा. नोकरी करतना शिक्षण सूरू दवरप शक्य जावचें म्हूण सरकार विद्यापिठांकडेन कबलात करतलें. सरकारी तशेंच खासगी वाठारांत नोकरेच्यो संदी निर्माण करपाचे सरकाराचे येत्न सुरू आसात. सांखळे भलायकी सेवे संबदी संस्थेंत प्रशिक्षण घेतिल्ल्या १५०० विध्यार्थ्यांक आयुश तशेंच हेर संस्थामदीं नोकरी उपलब्ध जाल्या. खासगी कंपन्यां मदीं ५ वा १० वर्सां नोकरी केल्या उपरांत कर्मचार्याचो पगार वाडटलो हाची तजवीज लेगीत सरकार करतलें.
बिहार हें मागासलेलें राज्य आसलें तरी सगल्यांत चड आयएएस बिहार राज्यांत तयार जातात, अशें मुख्यमंत्री डॉ. प्रमोद सावंत हांणी सांगलें.
खासगी कंपन्यांमदीं गोंयकारांक नोकर्यो मेळपाचें प्रमाण कितलें आसा, हाचो नियाळ सरकार घेत आसा. कामगार निरीक्षक आयडीसित भेटी दिवन हे विशींची म्हायती घेत आसात, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
