खावन जेवन सुखी

भांगरभूंय | प्रतिनिधी

आमकां पुर्तुगिजांनी निर्माण केल्लेंच गोंय घेवन बसपाचें आसा काय दिसता. आनी हाकाच लागून गोंयकारांक एक दीस उदकाक पादिसेर जावंचे पडटलें हातूंत दुबाव ना.

तीन दिसांचो कार्नावाल सोंपलो. वांगडाच ‘खाया, पिया, मजा करात’ म्हणपी किंग मोमोची राजवट सोंपली. किंग मोमोची
राजवट सोंपली म्हणून आमकां गोंयकारांक तसो कांयच फरक पडपा ना. आमी गोंयकार वर्सुयभर खावन, पियेवन सुखी आसतात. फकत किंग मोमोक मानपीच गोंयकार न्हय तर पुराय गोंयचे लोक, हातूंत नव्यान गोंयांत येवन गोंयकार जाल्लेय बी खावन जेवन सुखी आसात. कित्याक आसचे नात? गोंय सरकाराच्यो स्किमीच इतल्यो आसात त्यो कोणाकूच उपाशीं रावंक दिनात. लोक खावन, जेवन चड जाता म्हणून भायर व्हरून विकताय. तांतल्यान पियेवपाचीय वेवस्था जाता. हें सगळ्यांक खबर आसा देखून तर दर दिसा शेंकड्यांनी लोक रेल्वेंत बसून गोंयांत येतात आनी मडगांवचे फुटपाथ आडावन बसतात. तांकां आमच्या राजकी फुडाऱ्यांक मेळपाचें आसता. गोंयांत जागे फुकट, रेशन फुकट, भुरग्यांक शिक्षण फुकट, दोतोर- हॉस्पिटलां फुकट आनी जमलेंच तर एकादी सरकारी नोकरी. सरकारी नासल्यार नगरपालिकेची तरी खात्रीन मेळपाची. आमचो कोयर काडूंक नगरपालिकांक कामगार जायच न्ही. आमी काय असलीं कामां करिनात म्हणटकूच हांचीच गरज आमकां. आमी बेकार रावतले पूण असलीं कामां करचेनात. तीं कामां करूंक आमी देशा भायर वचपाचें. म्हणटकूच हें सगळें करूंक भायलेच जाय पडले. आनी कामा वांगडाच जेवणा सामान फुकट मेळटा म्हणपाची जायरात खुबश्या राज्यांनी जाल्ल्यान हीं भिरीं गोंयांत येतात. आतां तांकां जे कितें कळ्ळां तें फट म्हणुंकूय जावंचे ना. गरिबी रेशे सकयल्या लोकांक सरकार फुकेसवाय तांदूळ, गंव आनी हेर सामान दिता. गोंयांत गरीब म्हणटात ते कोण? हे भायले लोक ताचो फायदो घेतात.
म्हणटकूच वर्सूयभर आमी कार्नावाल मनयतात म्हणलें तर अतिताय जावची ना. मागीर तीन दिसांची किंग मोमोची राजवट सोंपली म्हणून आमकां कितें फरक पडटलो? तातूंत कार्नावाल सोंपता म्हणल्यार शिगमो येता.
सद्याक शिगमो आनी कार्नावाल हातूंत फरक उरूंक ना. दोनांचेय सरकारीकरण जालां. आनी सरकारीकरण जातकूच कितें जातलें तें सांगूक जाय? आतां कार्नावाल आनी शिगमो हांचो धंदो जाला. शिगम्यांतलें तर कवित्व सोपलां आनी तें जोडपाचें साधन जालां. सरकारूय हात सोडून खर्च करता. शिक्षण, पुस्तकां हांचेर खर्च करूंक सरकारा कडेन पयशे नात. पूण हीं असलीं फेस्तां करूंक जातात. हांगा सरकारचे हात सामके सदळ जातात. लोकांक तरी आनी कितें जाय? ‘खाया, पिया, मजा करात’ इतलेंच मेळ्ळ्यार पुरो आमकां.
गोंयकार हे खावन, जेवन सुस्त हें आमकांच खबर आसा अशें न्ही तर दिल्लीवाल्यांकूय हें खबर आसा. वोगीच तर दिल्लीचे लोक गोंयांत जागे घेवंक धडपडटात. दिल्लीच्या लोकांकूंच न्ही जाल्यार दिल्लीश्वराक लेगीत हें खबर जालां. भरिल्ल्या पोटार आंदोलनां जायनात अशें ओगीच म्हणलें तर अमीतभाईन. आमी भाय बी म्हणपाच्या नादाक लागनात. आमचे खातीर एकतर भाऊ, भाई वा बाबा. म्हणटकूच हेरांचो अमीतभाय आमचे खातीर अमीतभाई. तर अमीतभाईन सांगलें तें सामकें खरें. गोंयकारांक जर आंदोलनां करूंक कळिल्लीं, आंदोलनांच कित्याक आंदोलनां करतल्यांक हात दिवंक कळिल्लो जाल्यार आमचे कितले तरी प्रश्न सहज सुट्टले आसले. सिमाभागांत कितलीं वर्सां जालीं आंदोलन चललां, कितले तरी वाठार आमकां महाराष्ट्रांत घालात म्हणपाची मागणी करतात. कारवारचे लोक गोंयात येवंक सोदतात. फाटल्याच सप्तकाक महाराष्ट्र एकिकरण समितीन मुंबय वचून आंदोलन केलें. फाटलीं जायतीं वर्सां ते महाराष्ट्रांत वचपाच्या मुद्द्याचेर आंदोलन करतात. खानापूर, बेळगांव, निपाणी, बिदर, भालकी ह्या वाठारांतले लोक सामील आसले. हातूंत खानापूर, कारवार, सुपा- हल्ल्याळ हे कोंकणी वाठार. कणकुंबी, जांबोटी जंयच्यान म्हादय व्हांवता ते कोंकणी प्रदेश. पूण गोंयकारांक तांच्या प्रश्नांत लक्ष घालूंक जमना.
महाजन अहवाला प्रमाण, कोंकणी वाठार कोंकणी राज्यांत घालात म्हणपाची मागणी करप कोणाक शक्य जायना. खरें तर गोंय सरकारान हे प्रदेश गोंयांत विलीन करात म्हणपाची मागणी करूंक जाय आसली. सद्याच्या डबल इंजीन सरकाराक तें सहज शक्य आसलें. भाशावार प्रांत रचने प्रमाण हे वाठार गोंयांत येवंक जाय आसले. ते वाठारूच तशी मागणी करतात. पूण आमी तोंड धांपून फकत पळेतात. कारवारकार बाबडे आंदोलन करून खर्शेले आनी निर्शेलेय बी. सुपा- हल्ल्याळच्या कोंकणी लोकांक गोंयकारांचेर विश्वास ना. खानापूर गोंयचेर पातयेवन रावंक सोदिना. परिणाम फाल्यां जर हांकां महाराष्ट्रांत वचूंक मेळ्ळें जाल्यार ते वतले. कर्नाटकाच्या जुलमाक ते कंटाळळ्यात. आनी अशें घडलें तर गोंय आपणाले वाठार वगडावन बसतलें आनी आज म्हादयक लागून कर्नाटका कडेन झगडटात ते फाल्यां महाराष्ट्रा कडेन झगडचें पडटलें. कारण ह्या वाठारा वांगडाच म्हादय तेवटेन वतली. हे कोंकणी वाठार गोंयांत येत तर वांगडाच म्हादय आमचे कडेन येतली हाचो विचारूच आमी करिनात. खावन जेवन सुस्त आशिल्ल्याचो परिणाम न्ही तर कितें हें?
जेन्ना महाराष्ट्राचो खंयचोय मुख्यमंत्री हे मराठी वाठार महाराष्ट्रांत येवचे म्हूण येत्न करता, कर्नाटकाचो मुख्यमंत्री हे वाठार कर्नाटकाचेच म्हणटा, वेल्यान महाराष्ट्रांत आशिल्ले कानडी भाशीक प्रदेश कर्नाटकाक दियात म्हणून मागता अश्या वेळार गोंयचे राजकर्ते तोंड धांपून बसतात हाका कितें म्हणपाचें? गोंय सरकारान व्यक्त जावपाची गरज आसली न्ही? गोंयांत येवंक सोदपी कारवार, कणकुंबी, दोडामार्ग हांगच्या लोकांक फाटबळ दिवची गरज आसली. पूण आमी तें करिनात. आमकां पुर्तुगिजांनी निर्माण केल्लेंच गोंय घेवन बसपाचें आसा काय दिसता. आनी हाकाच लागून गोंयकारांक एक दीस उदकाक पादिसेर जावंचे पडटलें हातूंत दुबाव ना.

अभयकुमार वेलिंगकार
9423884687