खावटें घालपी मानशेकाराचेर कारवाय जावचीचः विरेश

भांगरभूंय | प्रतिनिधी

पणजीः नेवरा ओ ग्रॅण्ड मानशेक खावटें घालून खाऱ्या उदकांत शेतां बुडोवपी मानशेकारांचेर कारवाय जावंकूच जाय. तो कोणूय आसूं, ताणें जर कायदो मोडला आसत जाल्यार ताका ख्यास्त जावकूंच जाय. आपणें स्वता कितलेशेच खेपे मामलेदारा कडेन हाची फाटपुरवण केल्या, अशें थळावे आमदार विरेश बोरकार हांणी सांगलें. मामलेदारान फक्त एका मनशाकूच सुनावणे खातीर आपोवंक ना. समिती आनी हेर मानशेकार सुनावणेक हाजीर आसतले अशेंय तांणी सांगलें.
नेवरा मानशेक खावटें घालून खारें उदक खाजनांनी सोडून शेतां बुडोवपाचो यत्न चल्ला अश्यो कितल्योश्योच कागाळी शेतकारांनी केल्ल्यो. हे कागाळीची दखल घेवन तिसवाडी मामलेदारान मानशेकारांक अंतरीम निवाडो दिवन मानश्यो दुरुस्त करून 30 मेक निमाण्या निवाडाचे सुनावणे पयलीं त्यो जाग्यार घालच्यो. ना जाल्यार दंड दिवन समिती बरखास्त करतले, अशी शिटकावणी मामलेदारान दिल्ली. जाल्यार दोन मानशेकार सयद्द दोड्डामनी आनी विरेश हांचो भाव साईश बोरकार हांचे आड कारणां दाखय नोटिसी लेगीत काडिल्ल्यो.
हाचेर जाप दितना विरेश हांणी सांगलें की, ह्या विशयाचेर ते सेगीत आवाज काडीत आसात. ह्या विशयाचेर केन्ना ओगी रावंकना. स्वता हाची दखल घेवन ही समस्या मामलेदारा मुखार मांडिल्ली. थळाव्या शेतकारांक बरोबर घेवन सुवातेर भेट दिल्या आनी थयंची दारां मोडल्यांत हें शेतकारांनी दाखोवन दिलां. समीतीन वेळावेळार हे मानशेची दुरुस्ती करपाक जाय. तांकां मामलेदारां कडल्यान निधी येता आनी मागल्यार तो मेळटा. पूण समिती हातूंत लक्ष घाली ना असो आरोप विरेश हांणी केलाे.
जांणी लीज फारीक करूंक ना, जांणी दारां मोडून उडयल्यांत तांचेर कारवाय करता. हे विशीं लेखी कागाळ करप ही समितीची जापसालदारकी. समितीचो कार्यकाळ सोंपत पावला. फुडल्या म्हयन्यांत वेचणूक जावन समिती बदलूं येता, अशे विरेश बोरकार हांणी सांगलें.
फक्त मुंडकार आशिल्ल्या शेतकारांक मानशेची पावणी मेळटा. समिती आनी मामलेदार मेळून पावणी करतात. तातूंत सादीक दोड्डामनी ह्या गोंया भायल्या मनश्याक पावणी कशी मेळ्ळी हाचे स्पश्टीकरण समिती आनी मामलेदारान दिवपाक जाय. म्हजे म्हायती प्रमाण ह्या मनश्यान शेत विकतें घेतलां आनी तो मुंडकार जाला. पूण खरे कारण मामलेदाराक खबर आसतलें, अशें विरेश बोरकार हांणी सांगलें.