भांगरभूंय | प्रतिनिधी
आमदार विरेश बोरकार हांची आडनदरः रामराव वाघ
पणजीः नेवरेंचीं खाजनां खाऱ्या उदका पोंदा गेल्यांत, देखून हीं शेतां पेड्डेर जाल्यांत. खारें उदक शेतांनी वच्चे न्हय म्हूण नवो बांद बादिल्लो आनी मानशेच्या दारांची लेगीत दुरुस्ती केल्ली तरी लगेती हो विशय जाग्यार पडलो ना. पुराय शेतांनी खारें उदक भरिल्ल्यान शेतकारांक खाजन शेतां रोवपाक मेळनात. ते भायर ह्या उदकाची पातळी वाडत आशिल्ल्यान ज्या शेतकारांनी रोंपे आनी भाजी रोयल्या तांचेंय लुकसाण जाता.
हे विशीं उलयतना सांत आंद्रेंचे आम आदमी पक्षाचे फुडारी रामराव वाघ हांणी सांगलें, नेवरेंचें ओ ग्रेंड हें गोंयचे सगल्यांत व्हडलें खाजन. 2018 वर्सा 9 कोटी रुपया मोडून 6.5 किलोमिटर लांबायेचो कॉंक्रिटाचो बांद सरकारान बांदिल्लो. पूण इतले कोटी रुपया मोडून लेगीत दर शेतांनी खारें उदक घुसता आनी शेतकारांक शेतां रोवपाक मेळनात.
ह्या खाजनांक सात मानशीं आसात. तातूंतल्या पांच मानशेंचीं पावणी जाल्या. खारें उदक घुसपा फाटल्यान मानशेकार जापसालदार आसात असो दुबाव आमकां आसा. नेवरेंचे ओ ग्रेंड मुंडकार संघटणेन मामलेदाराच्या फुडारपणा खाला ह्या मानशेंची पावणी केल्ली. फक्त शेतकारांकच मानशेची पावणी घेवपाक मेळटा. पूण तांची नांवां पळयल्यार ते भायले अशें दिसून आयलां आनी ते मुंडकार म्हूण तांची नोंद ना, असो आरोप वाघ हांणी केलाे.
असल्या बेकायदो कामांक तेंको दिवपी सांत आंद्रेंचे आदले आमदार फ्रान्सीस सिल्वेरा खाजनाचे अावतिकायेक जापसालदार आसात. ते भायर सद्याचे आमदार विरेश बोरकार हांचे घर आनी शेता सामकार हें खाजन आसा. तरी लेगीत तांणी हे घडणुकेचेर आडनदर केल्या असोय आरोप रामराव वाघ हांणी केलाे.
ह्याच खाजनाच्या मात्शें मुखार कांय शेतकारांनी भाजी आनी रोंपे रोयल्यात. हें खारें उदक ल्हवू ल्हवू तांच्या शेतां मेरेन पावपाक लागलां. मामलेदारांनी ह्या खाजनांची वेळावेळार पळोवणी करप गरजेची आसा. तरी लेगीत ते आपले काम करिनात. मामलेदारांनी ह्या खाजनाची पळोवणी करची आनी जापसालदार आशिल्ल्यांचेर खर कारवाय करची अशी मागणी वाघ हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
