भांगरभूंय | प्रतिनिधी
वास्को: खारीवाड्यार ठोक नुस्तें विकप मुरगांव पालिकेन बंद उडयलें. हे सुवातेर सवाय नुस्तें मेळत आशिल्ल्यान शारांतल्या नुस्त्या मार्केटांत गिरायक येनाशिल्लें. ताका लागून मार्केटांतल्या नुस्तें विक्रेत्यांच्या वेवसायाचेर व्हड परिणाम जायत आशिल्ल्याचो दावो करून तांणी हें ठोक नुस्तें विकपाचें बंद करचें अशी मागणी पालिके कडेन केल्ली. जर थंय ठोक नुस्तें विकप बंद जालें ना जाल्यार आमी रस्त्यार नुस्तें विकतले अशी शिटकावणी मार्केटांतल्या विक्रेत्यांनी दिल्ली.
ते प्रमाण मुरगांव पालिकेन दखल घेवन खारीवाड्या वेली ठोक नुस्तें विकप बंद उडयलें. मजगतीं, आमचेर कारवाय करतात जाल्यार शार वाठारांतल्या फुटपाथार, रस्त्यार अतिक्रमण करून वेगळेवेगळे वेवसाय करप्यां आडूय कारवाय करची अशी मागणी ठोक नुस्ते विक्रेते मोती (मातीयस) मोंतेरा हांणी केली.
खारीवाड्या वेले विक्रेते सवाय मोलांत ल्हान व्हड नुस्तें विकत आशिल्ल्यान थंय नुस्त्याची खरेदी करपा खातीर गिरायकांची गर्दी जाताली. हाचे पयलीं सदर नुस्तें विकप कुन्हा चौकांतल्या वेगळ्यावेगळ्या दुकानांतल्यान जातालें. थंयचें नुस्तें विकप बंद करचें अशी मागणी नुस्त्या मार्केटांतल्या विक्रेत्यांनी केल्ली. ते प्रमाण थंयचें नुस्तें विकप बंद केल्लें.
पूण उपरांत खारीवाड्यार ठोक दरान नुस्तें विकप सुरू जालें. थंय पयलीं एक दोन विक्रेते आशिल्ले. पूण आतां तांचे संख्येंत भर पडल्या. नुस्तें विकतें घेवपा खातीर गिरायक खारीवाड्यार वचत आशिल्ल्यान नुस्त्या मार्केटांत गिरायक येना. ताका लागून आमकां गिरायकांची वाट पळोवची पडटा असो दावो मार्केटांतल्या नुस्तें विक्रेत्यांनी केलो. हाचे पयलीं लेगीत ठोक नुस्तें विक्रेत्या आड कारवाय केल्ली. कांय जाणांच्या दुकानांक सील मारिल्ले.
मजगतीं दरेक कारवायेच्या कांय दिसा उपरांत थंय परतून नुस्तें विकप सुरू जातालें. हाचे पयलीं लेगीत थंयचें ठोक नुस्तें विकप बंद जायत नाशिल्ल्याच्या निशेधार्थ मार्केटांतल्या नुस्तें विक्रेत्यांनी मुरगांव पालिका इमारतीच्या फुटपाथार नुस्त्याची विकपाक सुरवात केल्ली. ताका लागून मुरगांव पालिकेक ठोक दरान नुस्तें विकप्यां आड कारवाय करची पडिल्ली.
आतां परतून हो प्रस्न वयर सरला. त्या ठोक नुस्तें विक्रेत्यां आड कारवाय करपाची मागणी मार्केटांतल्या विक्रेत्यांनी केले उपरांत मुरगांव पालिकेन थंयच्या ठोक नुस्तें विक्रेत्यां आड कारवाय केली. तांची दुकानां बंद करपाक भाग पाडलें.
ह्या वेळार मुरगांवचे नगराध्यक्ष गिरिश बोरकर, मुख्याधिकारी दीपेश प्रियोळकार, पुलीस, येरादारी पुलीस, पालिका अधिकारी बी हाजीर आशिल्ले
ह्या वेळार थंयच्या विक्रेत्यांनी आमकां थारावीक वेळेंत नुस्तें विकपाक परवानगी दिवची अशी मागणी केली. सांजवेळा स ते आठ ह्या वेळार आमी नुस्तें विकतात. ह्या वेळार आमच्यो बोटी नुस्तें मारून परतून येतात. मेळिल्लें नुस्तें आमी विकतात. चार-पांच पाटले नुस्तें आशिल्ल्यान आमी ते मडगांवां धाडूंक शकनात. ते खातीर चड खर्च येता. ते खातीर आमी हांगा तें नुस्तें विकतात अशें तांणी स्पश्ट केलें.
पूण तुमी जाय जाल्यार मार्केटांत बसून नुस्तें विकात. हांगा तुमकां नुस्तें विकूंक मेळचें ना अशें नगराध्यक्ष गिरीश बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
