भांगरभूंय | प्रतिनिधी
मनोज परबः शेतकारांक काबार करपाक सरकार उठिल्ल्याचो आरोप
भांगरभूंय । प्रतिनिधी
पणजीः गोंयचीं खाजनां काबार जावचे वाटेर आसात. आरजीच्या आमदारान हीं खाजनां पुनर्जिवीत करपा सबंदांत परतून परतून विधानसभेंत गोंय सरकारा कडेन केली, पूम ह्या भाजप सरकारान कानार केस ओडल्यात. बिल्डर लोबीच्या फायद्या खातीर सरकार हीं शेतां काबार करपाक उठला, असो आरोप रिव्होल्युशनरी गोवन्स पार्टीचे अध्यक्ष आनी उत्तर गोंयचे उमेदवार मनोज परब हांणी केलो.
बिरेस्तारा मनोज परब हांणी पर्वरी मतदारसंघांतल्या साल्वादोर द मुंद गांवच्या सॉ पॉल वाठाराक भेट दिली. थंयचीं खाजनां पुराय उदकां पोंदा गेल्ल्याची तशेंच शेतकारांक शेतां कसपाक त्रास जातात, अशी कागाळ थळाव्या शेतकारांनी परब हांचे मुखार केली.
लुमार 500 शेतकार ह्या खाजनां पीक घेताले. कोण तरी मुद्दाम ह्या खाजनांत खारें उदक सोडटा, असो दुबाव शेतकारांक आसा. खाजनांत हुवार आयिल्ल्या कारणान शेता कसप कुस्तार जालां. सरकार, मंत्री आनी आमदार फुड्यांत तांणी साबार खेपे गाराणें घातलें, पूण अजून मेरेन तांकां कसलोच न्याय मेळूंक ना, अशें परब हांणी सांगलें. शेतकारांक उर्बा दिवपा खातीर सरकार इव्हेंट करता, पूम सत्य परिस्थिती वेगळी आसा. शेतांनी कश्ट करून पयलींच आत्मनिर्भर आनी स्वयंपूर्ण जाल्ल्या शेतकारांक सरकार काबार करपाक सोदता. बिल्डर लॉबीच्या बोल्सांत शेतां घालपा खातीर सरकारान हे यत्न चलयल्यात, असो आरोप परब हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
