भांगरभूंय | प्रतिनिधी
विजय सरदेसायः दुयेंतींक सुविधा दिवपाक भलायकी सेवा आसच्यो
भांगरभूंय । प्रतिनिधी
मडगांवः खाजगी वैजकी म्हाविद्यालय हाडपाचो उद्देश स्पश्ट जावचो. फुकट भलायकी सेवा मेळपाची गरज आसा. दक्षीण गोंयांत हॉस्पिटला खातीर जमीन दिवप्याक कसलो फायदो जातलो, समाजीक बदल जातले, ताचेर कसल्यो उपाय येवजण्यो करतले, ह्या प्रस्नांच्यो जापो मेळपाची गरज आसा. दक्षीण गोंय जिल्हो हॉस्पिटलांत दुयेंतींक गरजेच्यो त्यो सुविधा नात. वैजकी अधिकारी उपलब्ध नात. ते खातीर न्यायालयाचें दार मारचें पडलें. ताचेर कितें केलें तें सरकारान स्पश्ट करचें. दुयेंतींक गरजेच्यो त्यो सुविधा मेळच्यो ह्या उद्देशान भलायकी सेवा आसच्यो, अशें मत आमदार विजय सरदेसाय हांणी उक्तायलें.
घोगळांतल्या फ्लोरियानो वाझ सर्कलाचेर सिग्नल यंत्रणा बसोवपाच्या कामाक शेनवारा आमदार सरदेसाय हांचे हाजिरेंत सुरवात जाली. ह्या वेळार येरादारी वेवस्था सुदरावचे खातीर गरजेच्यो सगळ्यो गजाली करतात. एआय कॅमेरे बसयल्यार नेम मोडपाचे उणें जातले. पालिके वतीनूय रस्त्या कुशीचीं बेकायदो आस्थापनां काडचीं, अशें सरदेसाय हांणी सांगलें.
दक्षीण गोंय जिल्हो हॉस्पिटलांत सगळे तरेच्यो सुविधा मेळच्यो हे खातीर न्यायालयांत याचिका दाखल करची पडली. दुयेंतींक गरजेच्यो सुविधा उपलब्ध नात. हे खातीर न्यायालया वतीन गरजेच्या वैजकी अधिकाऱ्यांची नेमणूक आनी हेर भलायकी सेवा उपलब्ध करून दिवपाचे निर्देश दिल्यात. हें सरळें करून ते खासजी वैजकी म्हाविद्यालयाक दिवपाचे आसात काय कितें, असो प्रस्न सरदेसाय हांणी उपस्थीत केलो.
लोकांक फुकट भलायकी सेवा मेळच्यो हे खातीर 900 कोटी रुपया खर्च करून जिल्हो हॉस्पिटल बांदलें. गोमॅकाँत लेगीत खूबश्यो गजाली भायल्यान हाडपाक सांगतात, थंय लेगीत सगळें फुकट ना. लोकांक फुकट भलायकी सेवा दिवपाचें आस्वासन गोंय सरकार पाळटलें काय ना, हो प्रस्न उपस्थीत जाता. ट्रस्ट केलो तरीय लोकांचें प्रतिनिधित्व करपी व्यक्ती गरजेची आसता. दक्षीण गोंयांतल्या एकाय लोकप्रतिनिधीन वैजकी म्हाविद्यालयाची मागणी करूंक ना. खाजगी वैजकी म्हाविद्यालय हाडलें जाल्यार कोणाक फायदो जातलो? जमनी दिल्ल्यांक नोकरी मेळटली? थळाव्यांक कसलो फायदो जातलो, हाच्यो जापो मेळप गरजेच्यो आसात, अशें सरदेसाय हांणी सांगलें. सध्या जिल्हो हॉस्पिटलांत येवप्याक रस्त्याचेर गाडयो उब्यो दवरच्यो पडटात. ताका लागून वेंचणुके आदीं आस्वासनां दिवचीं न्हय. फातोड्डें मतदारसंघांत येवपी प्रकल्पां विशीं आपूण जागरूक आसा. जिल्हो हॉस्पिटलाचो विस्तार करपाचो विशय आसतना मदींच नर्सींग कॉलेजीचो विशय, मदींच वैजकी म्हाविद्यालयाचो मुद्दो फुडें येता. बऱ्या आनी फुकट उपचाराचो मुद्दो फाटी पडटा, अशेंय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
