भांगरभूंय | प्रतिनिधी
फोंडें: खांडेपारच्या नव्या पुलावेल्यान आयतारा सकाळीं संजना संजीव गावडे (४५, कुंकळ्ये – वेलिंग ) हे बायलेन दुदसागर न्हंयेंत उडी मारून आत्महत्त्या करपाचो यत्न केलो. गंभीर अवस्थेत जखमी जाल्ले बायलेक पुलिसांनी उदका भायर काडून हॉस्पिटलांत दाखल केली. मात दनपरां ४ वरांचेर उपचार चालू आसतना तिका मरण आयलें. फोंडें पुलिसांनी हे घडणुकेचो पंचनामो केला.
हे विशीं मेळिल्ले म्हायती प्रमाण, कुंकळ्यें- वेलिंग वाठारांत रावपी एक बायल आयतारा सकाळीं आपल्या पुताचे स्कुटरीवेल्यान कुळार वताली. खांडेपारच्या नव्या पुलार पावतांच अचकीत तिणें आपल्या पुताक दुचाकी थारोवपाक लायली. पुला लागसार स्कुटर थारयल्या उपरांत ते बायलेन रोखडीच पुलावेल्यान न्हंयेत उडी मारली. आवयन स्कुटरीवेल्यान न्हंयेंत उडी घेतिल्ले पळोवन स्कुटर पार्क करून तिच्या पुतान बोवाळ केलो. तेन्ना गस्त घालपी पुलिसांचे रॉबर्ट वाहनांतल्या कर्मचार्यांक हे विशीं म्हायती मळटांच तांणी रोखडीच घडणुके सुवातेर धांव घेतली. न्हंयेच्या उदकाची पातळी उणी आशिल्ल्यान उडी मारिल्ली बायल थंय आडकून उरली. मात ती जखमी जाल्ली. पुलिसांनी जखमी बायलेक रोखडीच १०८ ऍम्बुलन्सींतल्यान उपजिल्लो हॉस्पिटलांत व्हेली. तिच्या पांयांक आनी तकलेक मार लागिल्ल्यान चड उपचारा खातीर गोमेकॉंत धाडली. मात दनपरां उपचार चालू आसतनाच तिका मरण आयलें.
फोंडें पुलिसांनी घडणुकेचो पंचनामो केलो. निरीक्षक मोहन गावडे हांच्या मार्गदर्शना खाला उपनिरीक्षक चेतन वेळीप हे प्रकरणाचो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
