भांगरभूंय | प्रतिनिधी
पेडणें, प्रतिनीधी: तुयें हॉस्पिटल ते तुयें आयटीआय मेरेन जो रस्तो भौशीक बांधकाम खातें, उदका विभागा वरवीं खणटा, त्या रस्त्याची आजूनय दुरुस्ती आनी डांबरीकरण करूंक नाशिल्ल्यान आदले सरपंच तशेंच आतांचे पंच निलेश कांदोळकार हांणी तिडक उक्तायल्या. रस्त्याचें बेगीन डांबरीकरण करचें अशी मागणी तांणी केली.
मांद्रें मतदार संघा खातीर खासा उदकाची वेवस्था जावचे खातीर थळावे आमदार जीत आरोलकार हांणी यत्न करून तुयें आयटीआय वाठारांत एम एल डी चें उदक शुद्धीकरण प्रकल्प उबारपाची येवजण राबयली. हें काम करतना उदकाचीं पायपां घालपा खातीर भौशीक बांदकाम खात्यान हो रस्तो खणलो. दोन किलोमीटरच्या अंतरा मेरेन खणून लेगीत ह्या रस्त्याचें आजूनय डांबरीकरण करूंक ना. ताका लागून नागरीक तिडक उक्तायतना दिसतात.
मजगतीं, चलो पंचायत अभियान ह्या उपक्रमां खाला सभाघरांत आमदार जीत आरोलकार, समाज कल्याण मंत्री सुभाष फळदेसाय हाजीर आशिल्ले. तेन्ना कांय नागरिकांनी ह्या रस्त्याचो प्रस्न हाजीर केलो. तेन्ना मंत्री सुभाष फळदेसाय हांणी जो रस्तो खणला ताचेञ डांबरीकरण गरजेचें. ताका लागून भौशीक बांदकाम खातें, रस्तो विभागान, अधिकार्यांनी, लक्ष दिवपाची गरज आसा, अशें तांणी सांगलें.
हे विशीं आमदार जीत आरोलकार हांचे कडेन संपर्क केलो तेन्ना ह्या रस्त्याचें डांबरीकरण बेगीनूच करतले. तश्यो सुचवण्यो कंत्राटदार, अभियंत्यांक दिल्यात. ह्यान फुडें खंयचोय रस्तो खणल्यार ताचें रोखडेंच डांबरीकरण करपाची येवजण आशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
