खंयचीच शक्त भारताक बागोवपाक शकना

भांगरभूंय | प्रतिनिधी

प्रधानमंत्री : इंधन आनी संसाधनांचो उणो वापर करपाचो उलो

खबरां संस्था

जामनगर : खंयचोच देश ते मेरेन घटमूट जावपाक शकना, जे मेरेन तो आपल्या मुळां कडेन जुडिल्लो ना. भारतांत दायज आनी आधुनिकता एकामेका पसून वेगळे नात. आमच्या देशांत सांस्कृतीक आनी पवित्र थळांच्या पुनर्बांदणी वयल्यान खूब राजकारण जालां. दुर्दैवान आयज लेगीत अश्यो शक्ती आसात, ज्यो राष्ट्रीय स्वाभिमाना परस तुश्टीकरणाक अदीक म्हत्व दितात. संवसारांतली खंयचीच शक्त भारताक बागोवपाक शकना आनी चेपून दवरपाक शकना, अशें प्रधानमंत्री नरेंद्र मोदी हांणी सांगलें. ते सोमारा गुजरातच्या सोमनाथ मंदिरांत प्राणप्रतिश्ठापनेचीं 75 वर्सां पुराय जाल्ले निमतान कार्यावळींत वांटेकार जाल्ले.

लुटारूंनी सोमनाथ मंदिराची भव्यता काबार करपाचो यत्न केल. हें देवूळ परतून परतून मोडलें, पूण दर खेपे ताची पुनर्बांदणी जाली. आयचो दीस आनीक एका कारणा खातीर खास आसा. आयच्याच दिसा 11 मे 1998 ह्या दिसा देशान पोखरणांत अणुचांचणी केल्ली. त्या वेळार संवसारभरांतल्यो शक्ती भारताक चेपपा खातीर मैदानांत देंविल्ल्यो. भारता खातीर सगळे मार्ग बंद केल्ले, पूण आमी भियोवंक नात. भारतान पोखरण अणुचांचणीक ऑपरेशन शक्ती अशें नांव दिल्लें. कारण शिवा वांगडा शक्तीची पुजा करप हीच आमची परंपरा आसा. आपूण भगवान सोमनाथाच्या पांया कडेन नतमस्तक जावन ऑपरेशन शक्ती खातीर परबीं दितां, अशें प्रधानमंत्री मोदी हांणी सांगलें.

प्रधानमंत्री मोदी हांणी सेगीत दुसऱ्या दिसा लोकांक इंधन आनी संसाधनांचो उणो वापर करपाचो उलो मारलो. देशाक परकी चलन वाटावपा खातीर आनी संकश्टांतल्यान भायर सरचे खातीर जनसहभागाची गरज आसा. जंय शक्य आसा थंय मॅट्रो, इलेक्ट्रीक बस आनी भौशीक येरादारीचो वापर करात, अशेंय तांणी सांगलें.

जे तरेन देशान एकठांय येवन कोरोना संकश्टाक फुडो केल्लो, तेच प्रमाण सध्याच्या संकश्टांतल्यान लेगीत भायर सरतलो. भांगराचे आयातारीचेर लागीत देशाचो खूब प्रमाणांत पयसो विदेशांत वता. जे मेरेन परिस्थिती सामान्य जायना, ते मेरेन आमी भांगराची खरेदी टाळची, भांगराची गरज ना, अशें मोदी हांणी सांगलें.

खाद्य तेलाचो वापर उणो करपाचोय मोदी हांणी उलो मारलो. तांणी सांगलें, खाद्य तेलाचे आयातीचेर देशाचें व्हड विदेशी चलन खर्च जाता. जर लोकांनी खाद्य तेलाचो उणो वापर केलो, जाल्यार देश आनी शार दोगांचोय फायदो जातलो. सरकारी आनी खाजगी कार्यालयांनी वर्क फ्रॉम होन सुरू करपाचो आनी शाळांनी ऑनलायन वर्ग घेवपाचोय सल्लो मोदी हांणी दिलो. तांणी सांगलें, देशाक सध्या विदेशी चलन वाटावपाची गरज आसा आनी दरेका नागरिकाक आपले लागणुकेक प्राधान्य दिवचें पडटलें.