भांगरभूंय | प्रतिनिधी
राजदीप सरदेसायः विचारवेध व्याख्यानमाळेंतलें तिसरें व्याख्यान
भांगरभूंय I प्रतिनिधी
मडगांवः क्रिकेटींत घराणेशाय चलना. एखादो राजकारण, उद्देग वा बॉलिवूडांत काम करपाक शकता, पूण क्रिकेटींत निश्चीत ना. किक्रेटींत उत्कृश्ट कामगिरी करपाक एखाद्या कडेन लोकप्रीय आडनांव, प्रभाव, संपत्ती, सुविधा वा सामर्थ्य हाचे परस वेगळी प्रतिभा आसप गरजेची. पूण क्रिकेटींत कोणूय रिक्षाचालकाचो चलो आसूं, फळविक्रेतो आसूं वा शेतकार आसूं, ताचो फरक पडना. भारतीय क्रिकेट ही ताची बरी देख, अशें नामनेचे पत्रकार राजदीप सरदेसाय हांणी शुक्रारा मडगांवां गोमंत विद्या निकेतनांतले विचारवेध व्याख्यान माळेंत ‘डेमोक्रसी इलेव्हनः इंडियन क्रिकेटीचीं 75 वर्सां’ ह्या विशयाचेर उलयतना सांगलें.
ब्रिटीश भारतांत जेन्ना निकतीच क्रिकेटीक सुरवात जाल्ली, तेन्ना अशें नाशिल्ले. तेन्ना मॅचींनी फक्त महाराजांकूच मुखेली करताले. आयज फक्त चलेच न्हय जाल्यार चलयोय क्रिकेट खेळपाक मुखार येतात आनी पालक आनी देशा कडल्यान प्रेरणा घेतात, ही लक्तुबायेची गजाल, अशें राजदीप सरदेसाय हांणी सांगलें.
1932त क्रिकेटीचें मुखेलीपद पटियालाच्या महाराजांक आनी तांचे उपरांत पोरबंदरच्या महाराजांक दिल्लें. कारण ते बरे क्रिकेट खेळटाले म्हूण न्हय जाल्यार ते गिरेस्त अानी राजेशाय अाशिल्ले. हो राजेशायेचो खेळ आशिल्लो. आयच्या खंयच्याय ल्हान शारांतले चले-चलयो जर तांचे मदीं प्रतिभा आसत आनी खर कश्ट करपाची इत्सा आसत जाल्यार ते क्रिकेटीक तांचो खेळ म्हूण निवड करपाक शकतात आनी तातूंतल्यान आपलो फुडार घडोवपाक शकतात, अशें राजदीप सरदेसाय हांणी सांगलें.
ल्हान शारांतल्यान आयिल्लीं भुरगीं जिणेंत व्हड कार्य करपाक शकतात. कारण तांचे मदीं खर कश्ट करपाची संवय आसता. खर कश्ट करपाची इत्सा आसत जाल्यार ते जिणेंत येसस्वी जाताच, अशेंय तांणी सांगलें.
क्रिकेटींत समतोल विचारधारा
क्रिकेटींत समतोल विचारधारा आसता, कसलोच भेदभाव, जातीयवाद नासता. सगल्यांक समान संद मेळटा. भारतीय क्रिकेट पंगडांत खेळपी महम्मद सामी, महम्मद सिराज आनी उमराव मालीक ह्या खेळगड्यांचे बापूय ल्हान- व्हड वेवसाय करताले. तांणी आपल्या भुरग्यांक व्हड कश्टान वयर काडल्यात. विराट कोहली, महेंद्र सिंग धोनी हे खेळगडे ल्हान राज्यांतल्यान आयल्यात. खेळगडो भारताच्या खंयच्याय राज्यांतलो आसूं, ते राज्य ल्हान आसूं वा व्हड, निमाणो तो भारतीय खेळगडो आसता हे लक्षांत घेवपाची गरज आसा. 1949 ते 1950 ह्या काळांत जेन्ना भारतीय क्रिकेट पंगडांत जे खेळगडे खेळटाले तांकां उणें मानधन मेळटाले. पूण आयज कोट्यांनी रुपया खेळगड्यांक मेळटात. क्रिकेट हो पुराय संवसारांत खेळपाक येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
