भांगरभूंय | प्रतिनिधी
बाबाजी सावंत : येवजणेंत दुरुस्तीची मुख्यमंत्र्यां कडेन करतले मागणी
भांगरभूंय । प्रतिनिधी
पणजी : कांक्र दुयेंसा सयत हेर दुर्धर दुयेंसां खातीर शिक्षकांक रजा दिवपी येवजणेंत दुरुस्ती करपाची गरज आसा. दुरुस्ती करपाची मागणी आमी मुख्यमंत्री डॉ. प्रमोद सावंत हांचे कडेन करतले, अशें अखिल गोंय उच्च माध्यमीक शिक्षक संघटणेचे अध्यक्ष बाबाजी सावंत हांणी सांगलें. कांक्राच्या दुयेंतींक निदान जातकीर रजा मेळपाक जाय, अशी दुरुस्ती गरजेची आसा, अशें तांणी सांगलें.
दुर्धर दुयेंसां खातीर एक वर्स रजा दिवपाची जी येवजण जाहीर जाल्या तातूंत कितें बदल करपाक जाय, हे विशीं संघटणेची चर्चा चालू आसा. ही येवजण पयली ते बारावी मेरेनच्या शिक्षकां खातीर आसा. शिक्षकां कडल्यान एके कार्यावळींत ही मागणी जाल्ली. हाचे उपरांत संघटणेन चर्चा करून मुख्यमंत्र्या कडेन मागणी सादर केल्ली. हाचे उपरांत सरकारान रजा दिवपी येवजण जाहीर केली, अशें तांणी सांगलें.
हे येवजणे खातीर शिक्षकां कडल्यान अर्ज येवपाक लागल्यात. संघटणेचे वांगडी आशिल्ले शिक्षक तशेंच दोतोरां कडेन चर्चा करून आमी मुख्यमंत्र्याची भेट घेवन दुरुस्ती विशीं चर्चा करतले. अॅडवान्स स्टेजींतल्या कांक्र दुयेतींक वर्साची रजा मेळटा, तें योग्य आसा. मात कांक्राचें निदान जातकच रजा मेळपाक जाय. सुरवेक सावन उपचार सुरू जाले जाल्यारूच कांक्राचो दुयेंती जगपाची शक्यताय चड आसता. किडनी, काळीज तशेंच हेर कांय दुयेंसांचो लेगीत येवजणेंत आस्पाव जावपाक जाय. कसल्या दुयेंसा खातीर चड तेंप विसव घेवप गरजेचो आसता, ताची दोतोरां कडेन चर्चा करतले. हे येवजणे विशीं खूबशा शिक्षकां कडल्यान हरकती येवपाक लागल्यात. कांक्र दुयेंसा विशीं ही हरकत आसा. हेर हरकती तशेंच सुचोवण्यांचो विचार करून मुख्यमंत्र्या कडेन येवजणेंत जावपा आशिल्ले दुरुस्ती विशीं मागणी जातली, अशें तांणी सांगलें.
गोंयांतल्या खूबश्या शिक्षकांक तरेकवार दुयेंसां आसात. येवजणेंत बदल करपाची तांची मागणी आसा. कांक्र दुयेंसाचें प्रमाण वाडत आसा. हाका लागून ही येवजण दुयेंसां आशिल्ल्या शिक्षकांक पूरक थारतली. मात सध्या तिचो लाव मर्यादीत शिक्षकांकूच जाता. कांक्र दुयेंसा सयत हेर दुरुस्ती केल्या उपरांत ही येवजण दुयेंस आशिल्या शिक्षकां खातीर वरदान थारतली. कांक्र तशेंच किडनी, काळजाच्या दुयेंसा खातीर शिक्षकांक वर्सभर (365 दीस) रजा दिवपी खासा वैजकी रजा दिवपी सवलत सरकारान दिल्या. हे विशींचो आदेश 10 फेब्रुवारी 2026 ह्या दिसा जारी जालो. गोंय, दमण, दीव विद्यालयीन शिक्षण कायदो 1984 च्या खाला हो आदेश जारी जाला. अॅडवान्स स्टेज कांक्र दुयेंस वा हेर दुर्धर दुयेंसां खातिरूच उपचारा खातीर वर्साची रजा दिवपी ही सवलत आसा. मुळाव्या शिक्षका सयत उच्च माध्यमीक विद्यालयांत शिकोवपी शिक्षकां खातीर ही सवलत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
