भांगरभूंय | प्रतिनिधी
मुख्यमंत्री: वांटेकार आशिल्ल्यांचेर कडक कारवाय
पणजी : माशेल महिला को-ऑपरेटिव्ह सोसायटीच्या संचालकांनी कोट्यांनी रुपयांचो अर्थीक घोटाळो केल्ल्या प्रस्नाचेर हमी दितना मुख्यमंत्री डॉ. प्रमोद सावंत हांणी आयज विधानसभा सभाघरांत, अर्थीक घोटाळ्या विशीं ज्या सहकारी बँकांच्यो कागाळी सरकारा कडेन आयल्यात तांचे चवकशेक फुडल्या काळांत गती दितले. तशेंच घोटाळ्यांत वांटेकार आशिल्ल्यांचेर कडक कारवायूय करतले अशें सांगलें. शुन्य प्रहराक आमदार विजय सरदेसाय हांणी हो प्रस्न हाजीर केल्लो.
माशेल महिला को-ऑपरेटिव्ह सोसायटीच्या संचालकां कडल्यान कोट्यांनी रुपयांची अर्थीक भानगड जाला. मात तांचेर आजूनय कसलेच तरेची कारवाय जावंक ना. हे भानगडीचो फटको गुंतवणुकदारांक बसला. ताका लागून सरकारान हे बँकेंतल्या भानगडींची चवकशी करून ती करप्यां आड कारवाय करची आनी गुंतवणुकदारांचे पयशे मेळोवन दिवचे अशी मागणी सरदेसाय हांणी केली.
माशेल महिला सोसायटी सयत स सहकारी संस्थांनी घोटाळे जाल्ल्याच्यो कागाळी सरकारा कडेन आयल्यात. तांची चवकशीय सुरू जाल्या. फुडल्या काळांत चवकशेक गती दितले, अशें डॉ. सावंत हांणी सांगलें.
मजगतीं, माशेल महिला को-ऑपरेटिव्ह सोसायटीच्या संचालकांनीच कोट्यांनी रुपयांची भानगड केल्ल्याचो दावो कांय म्हयन्यां पयलीं गुंतवणुकदारांनी केल्लो. हे खातीर तांणी पणजे आंदोलनूय केल्लें. आमदार सरदेसाय हांणी मंगळारा हो विशय सभाघरांत हाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
