भांगरभूंय | प्रतिनिधी
खबरां संस्था
अल रयानः फिफा संवसारीक फुटबॉल सर्तींत आयतारा बरोच उलटफेर पळोवपाक मेळ्ळो. आपले पयलें मॅचींत स्पेना कडल्यान 7 गोलांनी हार खावपी कोस्टारिकान जर्मनीक हारावोपी जपानाचेर एकसुऱ्या गोलान जैत मेळयलें. मॅचींतलो व्हो एकसुरो गौल कोस्टारिकाच्या किशर फुलरान 81व्या मिनटाक केलो. ग्रुप ईत स्पेन, जपान आनी कोस्टारिकाचे 3 गुण जाल्यात. जर्मनी 0 गुणांनी निमणे सुवातेर आसा.
जपान आनी कोस्टारिका मॅचींत 80 मिनटाच्या खेळांत एकूय गोल जालो ना. दोनूय पंगडाच्या आघाडीच्या खेळगड्यानी गोल करपाचे सगले तरेचे यत्न केले. 81व्या मिनटाक किशर फुलरान पंगडाक जैत मेळोवन दिवपी गोल केलो. जपानाचो मिडफिल्डर चुकून बॉल कोस्टारिकाच्या तेजेदाक दिलो. ताणे फुलराक तो पास केलो आनी ताणे शानदार फिनिशींग करतना बॉल गोलकीपरा वयल्यान गोल नेटांत पावोयलो.
पुराय मॅचींत जपानाचें खेळाचेर वर्चस्व आशिल्लें. जपानान गोलपोस्टा कडेन 13 शॉट मारले. तातूंतले तीन गोलपोस्टा मेरेन गेले. कोस्टारिकान 4 शॉट मारले आनी तातूंतल्या एका शॉटाचें गोलांत रुपांतर जालें. जपानाच्या खेळगड्यानी चडांत चड वेळ बॉल आपल्या ताब्यांत दवोरलो. जपानाक पांच कॉर्नरी मेळ्ळो. कोस्टारिकाक एकूय कॉर्नर मेळूं ना. खेळाचेर निर्विवादपणान वर्चस्व दवोरून लेगीत जपानाक कोस्टारिका कडल्यान हार खावची पडली. तांच्या मिडफिल्डरान कोस्टारिकाच्या तेजेदाक बॉल दिलो नाशिल्ल्यो जाल्यार घडये मॅचीचो निकाल वेगळोच लागताशिल्लो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
