भांगरभूंय | प्रतिनिधी
हरयाणाची टिक टॉक हिरोयन आनी भाजपाची राष्ट्रीय फुडारी सोनाली फोगाट हिचो खून ड्रग्स घालून गोंयच्या दर्यादेग (कोस्टल) भागांत एका रॅस्टॉरंटान जालो, ही बातमी जेन्ना ब्रेक जाली तेन्ना गोंयचें नांव संवसारभर बदनाम जालें. सामान्य जनतेक भाजपाची फुडारी, सोनाली फोगाटाचो खून जाला हें जेन्ना गोंयचे सामान्य जनतेक कळ्ळे तेन्ना तांकां व्हडलो धपकोच बसलो. खाजगी सुवातींचेर, बाजारांत, दुकानांनी आनी बसीन प्रवास करताना लोक आतां एकूच गजाल उलयतात. लोक म्हणटात, गोंयांत उदकान ड्रग्स घालून जबरदस्तीन पिवपाक दिवन एके फामाद बायलेचो जीव घेवप हें पयलेंच फावट गोंयांत जाल्ल्याचें आयकपाक येता. सोनाली फोगाटाच्या खुनान आमच्या गोंयचें नांव सामकें पिड्ड्यार जालें. वता थंय गोंयची सामान्य जनता अशें उलयता.
फोगटाक प्रॉपर्टीक लागून तिच्या खासा पियेन आनी ताच्या इश्टान प्लॅन करून मारली, असो आरोप जाता. तश्यो बातम्यो छापून आयल्यात. प्रॉपर्टीक लागून जर गोंयांत प्लान करून हाडप आनी ड्रग्स घालून पयशाकारांक जितें मारपाक लागलें जाल्यार गोंयचें नांव संवसार मळार सामकेंच घाण जातलें. गोंयकारांच्या मनाचेरूय खंय तरी वायट परिणाम जातलो. आतां गोंयकार अशें उलोवपाक लागल्या की प्रत्येक भायलो मनीस जेन्ना गोंयांत भोंवपाक टुरिस्ट म्हूण येता तेन्ना, तें गोंयचें सैम पळोवन पिशें जाता. आनी तांच्या मनांत गोंयांत खंय तरी बरी प्रॉपर्टी विकत घेवन दवरपाची कशी दिसता. दुसऱ्या राज्यांतल्या बऱ्याच लोकांच्या मनांत हें येता. तेन्ना फाल्यां सकाळीं कांय वायट विचारांचे लोक गोंयांत टुरिस्ट म्हूण भोंवपाक येतले, तेन्ना गोंयकारांक सुद्दा प्रॉपर्टीक लागून अशें ड्रग्स घालून ते मारपाक शकतात. जे तरेन ड्रग्सांचो गोंयांत धंदो चल्ला तें पळोवन गोंयकारांच्या मनांत अशेंच विचार येवपाक लागतले.
गोंयच्या दर्यादेग भागांत ड्रग्सांचो धंदो सामको नेटान चल्ला. आतां मेरेन गोंयांत येवन ड्रग्स घेवन कितलेशेच देश- विदेशी तरणाटे मेल्ले. तशेंच ड्रग्स घेवन कितलेशेच खून, बलात्कार जाले. गोंयांत ड्रग्सांक लागून दिसान दीस गुन्यांव वाडत आसा. आनी ड्रग्सांचेर ताबो हाडपाक, ड्रग्स बंद करपाक गोंय पुलीस खात्याक आनी गोंय सरकारांक आयज मेरेन अजिबात जमलें ना. कित्याक काय? असो प्रस्न आयज सामान्य जनतेक पडला.
एक वेळ आशिल्लो तेन्ना ड्रग्स फकत दर्यादेग भागांत मेळटालें. पूण, आतां ड्रग्स गोंयच्या हिंटरलॅण्ड भागांत पावला. हिंटरलॅण्ड (राज्यांतलो भितरलो वाठार) भागांतूय आयज ड्रग्सांचो धंदो व्हडा प्रमाणांत चलपाक लागला. ड्रग्स आतां मुख्यमंत्र्याच्या मतदार संघांत पावला आनी भलायकी मंत्र्याच्या सत्तरींतूय पावलां. हिंटरलॅण्ड भागांत जे तरेन तरणाटे ड्रग्स घेवपाक लागल्यात तें पळोवन चुरचुरें दिसता. खूब दुख्ख जाता गांवगिऱ्या वाठारांतले तरणाटे ड्रग्स घेवन आपलें जिवीत पिड्ड्यार करतात तें पळोवन. भलायकी मंत्र्याच्या मतदार संघांत नवोदय शाळे कडेन जो रस्तो गेला त्या भागांत तरणाटे ड्रग्स घेतात. नवोदलया शाळेच्या कांय शिक्षकांनी वाळपय पुलीस स्टेशनांत कागाळ सुद्दा केल्ली. तशेंत पर्यां मतदार संघांत होंडा आयडीसी भाग आसा त्या भागांत चडशें रातचें हे प्रकार व्हडल्या प्रमाणांत चलतात. डोंगुर्ली पंचायत वाठारांत विटांची फॅक्टरी आसा त्या भागांत ड्रग्स घेवप चलता.
प्रत्येक धंदो त्या त्या योग्य काळांत, हंगामांत सामको फुलता. तशेंच गोंयांत टुरिस्ट सिजन आयलो काय ड्रग्सांचो धंदो बरोच फुलता, जशी पावसांत आमकां वता थंय वेगवेगळ्या तरांचीं फुलां फुलिल्लीं दिसतात, तसो ड्रग्सांचो धंदो टुरिस्ट सिजनांत फुलता. घुंवळे वखदांक आडोवपाक आयज मेरेन खंयचेंच सरकार यशस्वी थारिल्लें ना. गोंय सरकाराक जर ड्रग्स गोंयांत बंद करपाचो आशिल्लो जाल्यार तो फाटलीं वीस वर्सां पयलीं करता आशिल्ले. गोंयांत ऑक्टोबर, नोव्हेंबर आनी डिसेंबर म्हयन्यांत गोंयच्या दर्यादेग भागांत कितलेशेच तरणाटे पर्यटक ड्रग्स घेवन मरता. ते ड्रग्स घेवून मरिल्ल्या पर्यटकांची चवकशी करपाक वा विचारपूस करपाक गेल्यार, गोंय पुलीस खातें सांगता, तांकां खंय अनैसर्गीक मरण आयलें. पळयत तेन्ना ड्रग्स घेवन पर्यटक मरता दर्यादेग भागांत. आनी पळयत तेन्ना पुलीस ड्रग्साचें कारण लिपोवन दवरता.
सोनाली फोगाटाक ड्रग्स घालून मारून वडयली म्हूण कोणाकूच कळपा नाशिल्लें. जेन्ना वयल्यान सरकाराचेर खंय तरी प्रेशर आयलो, तेन्नाच चवकशेचीं चक्रां नेटान घुंवलीं. फोगाटाक लागून गोंयांत ड्रग्सांचो धंदो नेटान चालू आसा म्हूण परतून एकदा गोंयकारांक कळ्ळें. आतां मेरेन जे तरणाटे ड्रग्सांक लागून गोंयांत मेले, ते तरणाटे जर भाजपाचे कार्यकर्ते आशिल्ले जाल्यार तांची मरणाची चवकशी खोलायेन जाता आसली. सामान्य जनता जेन्ना ड्रग्साक लागून मरता, तेन्ना सरकाराक कांयच पडिल्लें नासता. तांचें मरण अनैसर्गीक जाता…. आनी भाजपाची फुडारी मरता तेन्ना तांकां सामकें चुरचुरें पडटा. लोकांचो फुडारी केन्ना जाता जेन्ना तांच्या बरोबर सामान्य जनता आसता तेन्ना. हें सरकार विसरलें आसतलें.
जेन्ना दर्यादेग वाठारांत एका बेकायदेशीर रॅस्टॉरण्टांत सगळ्याक सी सी टीवी कॅमेरे आसतना लेगीत, पर्यटकांक बिंदास ड्रग्स दितात आनी ते ड्रग्स घेतात. तें पळोवन कोणूय सांगपाक वा म्हणपाक शकता की त्या रॅस्टॉरण्टाचो धनी, व्हडल्या व्हडल्या प्रशासकीय, पुलीस अधिकाऱ्यांक हप्ते पावयतात म्हूण. दर्यादेग भागांत चडशा रॅस्टॉरण्टांनी पर्यटकांक जाय तशें ड्रग्स मेळटा. कोस्टल भागांत बिंदास ड्रग्सांचो धंदो चलपाक मुख्य कारण पुलीस, असो म्हजो आरोप. कांय पुलीस अधिकारी ड्रग्सांच्या धंद्याचे हप्ते घेवन घेवन आतां सामके गब्बर जाल्यात. तें कोणाकूच आयकना आतां. आपल्याक जाय तशें वागतात. आनी तांच्यांनी हिंटरलॅण्ड भागांत जमनी विकत घेवन आपल्या भुरग्यांच्या, बायलेच्या वा भावाच्या नांवाचेर करून, व्हडलीं व्हडलीं फार्म हावजां घातल्यात. हिंटरलॅण्ड भागांत आयज ड्रग्स पावपाक तेच कारण आसूं येता.
आयज संवसारभर लोक गोंयाक एक ड्रग्स डॅस्टीनेशन कशें पळयता. चडशें पर्यटक गोंयांत येता तें फक्त ड्रग्स घेवन धुमशेणां घालपाक. दुसऱ्या राज्यांतले पर्यटक, गोंय आनी गोंयकार सामके लायटली घेता. ते पर्यटक ड्रग्स घेता आनी वता थंय गोंयांत फकत वायट गजालींचो खोदोळ घालतात. आपल्या राज्यांत परत वता आनी गोंयचें नांव पाड करता. पर्यटन खात्यान पर्यटकांक कडक शिस्त लावपाक जाय. गोंयांत जे तरेन पर्यटक धुमशेणां घालतात तशीं दुसऱ्या देशांनी घालपाक मेळनात. भायल्या देशांनी पर्यटकां खातीर बरी शिस्त आसता, ती शिस्त गोंयांत पर्यटकां खातीर ना.
ड्रग्सांच्या धंद्याक लागून गोंयांत गुन्यांव वाडत चल्ल्यात. गोंय आतां गोंयकारां खातीर सुशागाद उरिल्लें ना. सुशेगाद गोंयांत आयज वता थंय क्रायम वाडत चल्ल्यात. सुशेगाद जगपी गोंयकारांक आयज भिवून दीस काडचे पडटात. कारण जेन्ना एक गोंयकार बारीक सारीक चुको करता तेन्ना ताका पुलिशेंत हाडून धमकावन, मारून व्हडलीं
व्हडलीं कलमां लायतात. गोंयचें नांव ड्रग्सांक लागून पाड जाता ताचे विशीं कोणूच कांयच करिनात.
देवेंद्र गणेश गांवकार
7798106277
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
