भांगरभूंय | प्रतिनिधी
कॉंग्रेसीच्या शिश्टमंडळाचें राज्यपालांक निवेदन
पणजीः फाटले कांय दीस जाल्ल्या खुनांच्या घडणुकांक लागून राज्यांत कायदो आनी सुवेस्था सामकीच कोसळ्ळ्या देखून गोंयकार तशेंच पर्यटकांचे सुरक्षेचो प्रस्न उप्रासला. राज्यपाल अधिकाराचो वापर करुन हे विशीं हस्तक्षेप करपाची मागणी करपी निवेदन कॉंग्रेसीच्या शिश्टमंडळान राज्यपालांक सादर केलें.
कॉंग्रेसीचे गोंय प्रभारी माणीकराव ठाकरे, प्रदेशाध्यक्ष गिरीश चोडणकार, विरोधी पक्ष फुडारी युरी आलेमाव, कार्यकारी अध्यक्ष कार्लुस फेरेरा आनी हेर फुडार्यांच्या शिश्ट मंडळान लोक भवनांत वचून राज्यपालांची भेट घेवन तांकां निवेदन भेटयलें.
गोंयांत कायदो आनी सुवेस्था काबार जाल्या. हाका सरकार आनी गृह खातें जापासलदार आसा, असो आरोप ठाकरे हांणी केलो.
हेर राज्यांचे तुळेंत सगळ्यात चड गुन्यांवकारी गोंयांत घडल्यात आनी कमी करपा खातीर सरकाराचे वतीन कसलेच यत्न जायनात. देश तशेंच राज्या खातीर कायदो सुवेस्था म्हणटा ती म्हत्वाची गजाल आसा. जर कायदो आनी सुवेस्था सारकी ना हाचो अर्थ तो प्रदेश वा थंयचो सरकार सारको चलना. गोंयची जनता चिंतेंत आसा, मात सरकाराक भ्रश्टाचारा शिवाय दुसरें कांयच खबर ना, अशी टिका ठाकरे हांणी केल्या.
जे भशेन खून, बलात्कार आनी चोरयो सारकिल्ल्यो वाडपी गुन्यांवकारी घडणुको दाखोवन दितात की गोंयांत कायदो आनी सुवेवस्था ना, असो आरोप युरी आलेमांव हांणी केलो.
गोंयांत फाटल्या तीन वर्सांत १२७ खून जाले, ३८३ बलात्कार जाले आनी २११३ चोरयो जाल्यो, ३५० किडनेपींग आनी १२०० मारबडयच्यो घडणुको जाल्यो. गोंयांत कायदो वेवस्था राखपाक पुलीस अपेसी थारल्यात, अशें आलेमाव हांणी म्हणलें.
गोंयांत हफ्ता राज आनी गुंडा राज चलोवन पुलिसांक म्हयन्यांत अमके पयशे हाडपाचें टार्गेट दितात. आमी राज्यपालांक सांगलां, तांणी कोसळिल्लो कायदो आनी सुवेस्था विशीं बेगीनूच हस्तक्षेप करचो आनी जापसालादरकी सुनिश्चीत करची, अशी मागणी आलेमाव हांणी केली.
खासा करून फाटोफाट जे दोन खून जाल्यात ते पळयल्यार गोंयकारांक गोंय असुरक्षीत दिसपाक लागलां. आवय बापायक आपल्या भुरग्यांक शाळेंत धाडपाक भिरांत दिसता. लोकांक घरांतल्यान भायर सरपाक भंय दिसता आनी आतां पर्यटकांक गोंयांत येवपाक भंय दिसपाक लागतलो काय कितें असो दुबाव येता, अशी चिंता गिरीश चोडणकार हांणी उक्तायली.
कायदो आनी सुवेस्था कशी कोसळत आसा. देखून राज्यपालान हस्तक्षेप करून गृह खात्याचेर नियंत्रण घेवपाची गरज आसा तशेंच मुखेल सचीव आनी डीजीपी हांकां जापसालदार धरपाची गरज आसा, अशी मागणी चोडणकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
