भांगरभूंय | प्रतिनिधी
पणजी, समीप नार्वेंकार : फाटल्या कांय वर्सां चार्टर विमानांत उणाव दिसून आयले उपरांत, गोंयांत 2022-23 सात चार्टर विमानांत बरीच वाड जाल्ली दिसता. कोविडाक लागून गोंयांत चार्टर विमानां येवपाचीं सामकींच बंद जाल्लीं. मात कोविड काळा उपरांत वाडपाक लागल्यांत.
पर्यटन खात्यान दिल्ले आंकडेवारी प्रमाण, ऑक्टोबर 2022 ते मार्च 2023 मेरेन 334 चार्टर विमांनांनी 69,691 पर्यटक गोंयांत आयिल्ले. देखून फाटलीं पांच वर्सां चार्टर विमानांत सेगीत उणाव जाले उपरांत गोंयचें पर्यटन मळ परत एक फावट मार्गाक लागपाक सुरवात जाल्या.
आॅक्टोबर 2017 ते मे 2018 ह्या काळांत चार्टर विमानांत उणाव जावपाक सुरवात जाली. हे वर्सा 981 विमांनांनी 2,47,365 पर्यटक गोंयां आयल्ले. हो आंकडो परत एक फावट देंवून आॅक्टोबर 2018 ते मे 2019 ह्या काळांत 813 विमानांत 2,18,876 पर्यटक आयले. फुडल्या वर्स परत उणाव जावन आॅक्टोबर 2019 ते मे 2020 हे काळांत 625 विमानांत 1,69,142 पर्यटक आयिल्ले. मात 2021 त हो आंकडो सामको शुन्याचेर पावलो. कोविडाक लागून आंतरराष्ट्रीय प्रवास सामकोच बंद आशिल्लो. देखून एकूय विमान ह्या काळात येवंक ना.
मात कोवीड सोंपले उपरांत 2022-23 सात चार्टर विमानांनी गोंयांत येवपाक सुरवात केली. आॅक्टोबर 2021 ते मे 2022त जेन्ना पर्यटन वेवसाय जाग्यार पडपाक सुरवात जाल्ली तेन्ना फक्त 42 विमानांनी 7,630 इतले पर्यटक आयिल्ले. उपरांत आॅक्टोबर 2022 ते मार्च 2023 हो काळ चार्टर मळा खातीर खोशयेचो काळ थारलो. ह्या काळांत 334 विमानांनी 69,691 पर्यटक आयले. हो आंकडो व्हडलो नासलो तरी गेल्या वर्सा परस चड वाड जाल्या हे खरें! हो आकडो कोरोना काळा पयलींच्या आंकड्यांक हुपूंक जरी पावूंकना तरी ही मात्शी वाड थळावी अर्थवेवस्था आनी पर्यटन मळार थाकाय दिवपी थारल्या.
पर्यटन मळार निगडीत आशिल्ल्या भागधारकांच्या फुडारा खातीर खुपश्यो इत्सा आनी अपेक्षा आसा. येवपी पर्यटन हंगामांत चार्टर विमानांत वाड करून जी स्थिती कोवीड काळा पयलीं आसली ती परत हाडपाचे यत्न चालू आसात. जसो जसो अंतरराष्ट्रीय पर्यटन ल्हव ल्हव जाग्यार पडत आसा तेच बराबर गोंय हें अंतरराष्ट्रीय प्रवाश्यांनी भेट दिवपी पयलें स्थान जातलें, अशी आस्त पर्यटन भागधारकांनी उक्तायल्या.
वर्स : चार्टर विमाना : पर्यटक
2017-18 : 981 : 247,365
2018-19 : 813 : 218,876
2019-20 : 625 : 169,142
2020-21 : 0 : 0
2021-22 : 42 : 7,630
2022-23 : 334 : 69,691
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
