भांगरभूंय | प्रतिनिधी
नवी दिल्ली, खबरां संस्था: कोरोनाचो प्रसार नियंत्रणांत हाडपा खातीर कोव्हिशिल्ड आनी कोव्हॅक्सिन ह्या व्हॅक्सिनांचे दोन- दोन डोस दिले. सरकारान व्हॅक्सीन दरेक नागरिकान घेवचें, अशे यत्न केल्ले. आतां कोव्हिड महामारी आनी लॉकडावन ह्या सगळ्या घडणुकांक दोन वर्सां परस चड वेळ जावन गेलो. मात हालींच करोनाचेर कोव्हिशिल्ड व्हॅक्सिना विशीं एक धक्को दिवपी दावो मुखार आयलो. ही लस घेतल्या उपरांत काळजाचो झटको आयिल्ल्यांच्या आंकड्यांत वाड जाल्या, तशेंच टीटीएस वा रक्तांत गुळे जावपाचो धोको निर्माण जाला. ‘कोव्हिशिल्ड’ विकसीत करपी कंपन्यां कडल्यान ब्रिटनच्या न्यायालयांत लशीच्या धोक्याचे पुरावे दाखल केल्यात. आतां हीं सगळीं प्रकरणां सर्वोच्च न्यायालयांत पावल्यांत.
कोव्हिशिल्ड व्हॅक्सीनाचे सायड इफेक्ट प्रकरण सर्वोच्च न्यायालयांत पावलां. सर्वोच्च न्यायालयाचे वकील विशाल तिवारी हांणी एक याचिका दाखल केल्या. कोर्टान एम्सच्या डायरेक्टराचे अध्यक्षते खाला तज्ज्ञांचें एक पॅनेल स्थापन करपाचे निर्देश दिवचे, अशी मागणी याचिकेंत केल्या. हे समितींत सर्वोच्च न्यायालयाचे सेवानिवृत न्यायाधीश हांचे देखरेखे खाला कोव्हिशिल्डाक लागून निर्माण जावपी धोके आनी सायडइफेक्टांची चाचणी जावची, अशेंय याचिकेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
