भांगरभूंय | प्रतिनिधी
भांगरभूंय । प्रतिनिधी
वास्कोः कोळसो आनी बॉक्सायड प्रदूशणा संबंदी फावो ती उपाय येवजण करपाचें तशेंच प्रदूशणा संबंदीचो अहवाल जाहीर करपाचें आस्वासन एमपीएचो (मुरगांव बंदर प्राधिकरण) अध्यक्ष एन विनोदकुमार हाणे शुक्रारा जाल्ले बसकेंत दिला अशें मुरगांवचो आमदार संकल्प आमोणकार हाणे सांगलें. प्रदूशणा खातीर चर्चा करपा खातीर नगरसेविका श्रद्धा संकल्प आमोणकार सोडल्यान हेर नगरसेवक आयले ना हे खातीर आमोणकारान तांचेर फोग काडलो. म्हाका लोकांच्या भलायकेचें पडलां. नगरसेवक आयले ना म्हणून कांय फरक पडना. आपूण लोकांच्या सहकार्यान आवाज उठयत रावतोलों अशें ताणे सांगलें.
कोळसो आनी बॉक्सायडाक लागून जावपी प्रदूशणा खातीर मुरगांव पालिका मंडळाचे बसकेंत कांय नगरसेवकांनी आमदार आमोणकार हाका लक्ष्य करपाचो यत्न केल्लो. आमोणकारान प्रदूशणा आड आवाज उठोवपाक फुडाकार घेवचो अशें आवाहनूय केल्लें. ते प्रमाण ताणे मुरगांव मतदारसंघांतल्या एक तें णव प्रभागांतल्या नगरसेवकाक शुक्राराक विनोदकुमार हाचे कडेन चर्चा करपाक येवपाक सांगल्लें. मात श्रद्धा आमोणकार सोडल्यार हेर नगरसेवक चर्चा करपाक आयले नात.आमोणकारान श्रद्धा तशेंच तुळशीदार खवणेकार आनी शांताराम पराडकार हागा वांगडा घेवन विनोदकुमार हाचे कडेन चर्चा केली.
दोन दिसां पयलीं आठ नगरसेवक आपल्या मेळून गेल्ल्याचें जेन्ना विनोदकुमार हाणे सांगलें तेन्ना म्हाका अजाप दितले. तांणी कसली मागणी केली अशें विचारलें तेन्ना ते चा पिले आनी फोटो काडून गेले अशें सांगलें. त्या नगरसेवकांचो कसलो ल्हिपल्लो अजेंडा आसा हें स्पश्ट जालां. तांणी प्रदूशण आडावपाची तरी मागणी करपाक जाय आशिल्ली. हे नगरसेवक आपल्या वांगडा आयिल्ले जाल्यार मुरगांव बंदरांत चलिल्ल्या वेव्हारा संबंदी ते उक्तें पडटाशिल्ले अशें आमोणकारान सांगलें.
ह्या नगरसेवकांक बर्थ नंबर 10 आनी 11 चें खाजगीकरण करपाचें आसा असो आरोप आमोणकारान केला. सध्या ह्या बर्थांचेर गोंयकार व्यक्तीचें वेवसाय चलतात. मात ह्या नगरसेवकांचे भूमिकेक लागून फुडाराक गोंयांतल्या व्यक्तीचें वेवसाय बंद पडपाची भिरांत आमोणकारान उक्तायली. ताणें नांव घेनासतना एका आदल्या आमदाराक लक्ष्य केलें. एका नगरसेवकाची जो पयलीं नगराध्यक्ष आशिल्लो तांची मशिनरी मुरगांब बंदरात आसा. नगरसेवक म्हज्या वांगडा आयिल्लो जाल्यार तांचे धंदे उक्ताडार येताशिल्लें. म्हणून ते म्हज्या वांगडा चर्चेक आयले नात. विनोदकुमार हाका परस्पर मेळून गेले अशें आमोणकारान सांगलें. ह्या नगरसेवकांनी म्हजी प्रतिमा इबाडपाचो यत्न केलो पूण तेच आतां लोकां सामकार उक्ते पडल्यात अशेय ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
