भांगरभूंय | प्रतिनिधी
मडगांव, प्रतिनिधी : नुस्तेंमारी हंगाम १ ऑगस्ट सावन सुरु जावपाचो आसा हें खबर आसून लेगीत दर्यांत नुस्तेंमारी खातीर गेल्ली बोट उमथली. बोट उमथल्या उपरांत नुस्तेमार्यांनी बोवाळ केलो. बोवाळ आयकून दर्यादेगेवेले जिवरक्षक, पर्यटक पुलिसांनी धांवपळ करून बुडपी १३ नुस्तेंमार्यां सयत बोट दर्यादेगेर हाडली. हातूंत नुस्तेंमार्यांक आनी जीवरक्षक साहिल तुळसकार हाकाय मजत करतना दुखापत जाल्या.
ही घडणूक सोमारा सकाळीं सुमार सवाय धा वरांचेर घडली. जीवरक्षक आनी पर्यटक पुलिसांक दर्यांतल्यान वाटोवपाचो उलो आयकुपाक आयलो. तेन्ना दर्यांत बोट उमथल्या आनी नुस्तेंमार बोवाळ करतात हें समजलें. र जीवरक्षक आनी पर्यटक पुलिसांनी मदतकार्य करून बोटींतल्या १३ नुस्तेमार्यांचो जीव वाटयलो.
मजगतीं, नुस्तेंमारीक ३१ जुलय मेरेन बंदी घात्ल्या. नुस्तेंमारी हंगामाक १ ऑगस्ट सावन सुरवात जाता. २५ जुलयाक परंपरीक नुस्तेंमार्यांनी प्रार्थना करून १ ऑगस्टा उपरांत हवामान बरें आसल्यार नुस्तेंमारी खातीर बोट घालतले अशें सांगिल्लें. मात दर्या खवदळिल्लो आसतना नुस्तेंमारी बोटी घाल्ल्यान बोट उमथली. इंजिन सुरु जायनाशिल्ल्यान ही घडणूक घडली.
मजगतं, मजत कार्या वेळार जीवरक्षक साहिल तुळसकार हाच्या तोंडाक दुखापत जाल्या. ताका उपचारा खातीर दक्षीण गोंय जिल्लो हॉस्पिटलांत व्हेलां. तशेंच वाटयल्ल्या नुस्तेंमार्यांकूय दुखापत जाल्ल्यान तांचेर उपचार केलो.
वाटयल्ले नुस्तेंमार आंध्रप्रदेशांतले
वाटयल्ले सगळे नुस्तेंमार हे बागमपूर, आंध्रप्रदेशचे. हातूंत वाल्की (४२), पुरुषोत्तम (४३), नारायण (४२), प्रलय (५०), बी. सेरादाय (५४), केसराव (४५), पोर्राराव (३०), मधराव (३२), नागराज (३४), गोपालसिंग (३२), पवन कुल्लू (२८), कौरलाया (५०), एस. वॉरलॉय (४६) हांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
