भांगरभूंय | प्रतिनिधी
म्हापशें, प्रतिनिधी ः कोलवाळ केंद्रीय बंदखणीच्या बायल कैद्यांच्या वॉर्डांत दादल्या अधिकाऱ्यांक वचपाचे आसल्यार वांगडा बायल अधिकारी आसप कायद्या प्रमाण सक्तीचें आसा. तशेंच अधिकारी बायल कैद्यांक कित्याक मेळ्ळो हाची सविस्तर म्हायती बंदखण अहवाल पुस्तकांत नोंद करप सक्तीचें आसा. ह्या कायद्याक खरपणान पाळो दिवचो अशीं सुचोवणी गोंय मानवी हक्क आयोगान दिल्या.
कोलवाळ केंद्रीय बंदखणीतल्या कांय बायलां कैद्यांनी फाटल्या वर्सा जूनांत कागाळ केल्ली. दादल्या अधिकाऱ्यांक बायल कैद्यांच्या वॉर्डांत थेट प्रवेश करपाक बंदी आसा. तरी लेगीत ते जायते फावटीं बायल वार्डन तांचे वांगडा नासतना बायल कैद्यांच्या वॉर्डांत वता आनी तांका त्रास दितात अशें कागाळींत म्हणला. हेच कागाळीची दखल घेवन काल (7 तारखेक) आयोगाच्या अधिकाऱ्यांनी भेट दिवन पळोवणी केली. ते उपरांत आयोगान ‘गोंय बंदखण नेम, 2021’ च्या ‘नेम 1445’ चो उल्लेख करून नोटीस जारी केल्या. कायद्यान थारायिल्ले नेमांची पूर्णताय जाय मेरेन खंयच्याच दादल्या अधिकाऱ्याक बंदखणीच्या बायलांच्या वॉर्डांत खंयच्याय वेळार प्रवेश करपाक परवानगी ना अशें आयोगान नोटिशेंत म्हणलां.
आयोगान दिल्ल्यो सुचोवण्यो…
० खंयच्याच प्रौढ दादल्या अधिकाऱ्यान वा कर्मचाऱ्यांन रातच्या वेळार बायल बंदखणींत प्रवेश करचो न्हय.
० आपत्कालीन स्थिती वेळार बायल वार्ड/ बायल अधिकारी वांगडा प्रवेश करुं येता. पूण ताचे आदीं तांकां थंयच्या नोंदणीं बुकांत तपशील आनी भेट दिवपाचें कारण बरोवचें पडटलें.
० सगळे अधिकारी आनी कर्मचारी कायद्याचें पालन करतात हाचेर नदर दवरप ही बंदखण प्रशासनाची जापसालदारकी. हाची खरपणान अंमलबजावणी जावपाक जाय.
कोलवाळ बंदखणींत बायल अधिकारी, कर्मचाऱ्यांचो उणाव
कोलवाळ बंदखणींत 34 बायलां कैदी आसात. देखून फकत दोन बायलां जेल गार्ड तांची सुरक्षा वेवस्था पळयतात. उरिल्ले अधिकारी आनी कर्मचारी दादले आसात. सर्वोच्च न्यायालयाच्या मार्गदर्शक तत्वां प्रमाण हांगा 2 बायल जेलर, 4 बायलां सहाय्यक जेलर, 3 हेड गार्ड आनी 9 जेल गार्ड मनीसबळ गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
