भांगरभूंय | प्रतिनिधी
पुतणया आड दखलपात्र गुन्यांव नोंद करपाची मागणी
म्हापशें: ज्येश्ठ नागरीक जोडप्याक दुबावीत पुतणया कडल्यान खर मारपेट जाली. पूण कोलवाळ पुलिसांनी फक्त अदखलपात्र गुन्यांव नोंद केला आनी ह्या प्रकरणांत दखलपात्र गुन्यांव नोंद करून आशीश नायक आनी ताची घरकान्न आनी आवयचेर कायद्या वरवीं कारवाय करची अशी मागणी राम भुवन वाडो, कोलवाळचे प्रज्वला नायक आनी प्रदीप नायक हांणी पुलीस म्हासंचालका कडेन केल्या.
हे विशीं नायक जोडप्यान पुलीस म्हासंचालक, उत्तर गोंय पुलीस अधिक्षक, पुलीस उपअधिक्षक आनी कोलवाळ पुलीस निरिक्षकांक निवेदन सादर केलां.
हो गाळी संवून मारपेटीचो प्रकार फाटल्या 30 मार्च दिसा रातच्या 9.30 वरांच्या सुमाराक घडिल्लो. कागाळदार प्रज्वला नायक हांणी ह्या निवेदनांत म्हणलां की, घडणुकेच्या दिसा गांवांत धुळवट आशिल्ली. आपूण घरांत एकलीच आशिल्ली. रातचो दुबावीत आरोपी आशीश मोतीराम नायक हो आपल्या घरांत बेकायदो घुसलो आनी म्हाका गाळी संवून खर मारपेट केली. ह्या वेळार दुबावितान आपलो विनयभंग लेगीत केलो.
जेन्ना घरकार प्रदीप नायक हे घरा आयले तेन्ना घडिल्लो प्रकार हांवें तांकां सांगलो. ते जाप विचारपा खातीर दुबाविताच्या घरा गेले तेन्ना दुबावीत आशीश, ताची घरकान्न आनी आवयन दार बंद करून ताका भितर घालून गाळी संवून तांकांय खर मारपेट केली. तशेंच आमकां जिवेशी मारपाची धमकीय दिली. हे मारपेटींत म्हजी कानांतलीं फुलांय शेणलीं.
उपरांत आमी दोगांय घोव, बायल जखमी अवस्थेंत कोलवाळ पुलिशेंत आयले आनी कागाळ दिली. आमचेर म्हापशेंच्या जिल्हो हॉस्पिटलांत उपचार केले. जाल्यार दुसऱ्या दिसा 31 मार्च दिसा पुलिसांनी भादंसंच्या 324 आनी 504 कलमा खाला अदखलपात्र गुन्यांव नोंद केलो.
हो दखलपात्र गुन्यांव आसून लेगीत ड्युटीर आशिल्ल्या पुलीस हवालदारान आमची कागाळ योग्य तरेन नोंदय नासतना आपल्याक जाय तशें बरयलें. ताका लागून वयल्या दुबाविता आड योग्य असो दखलपात्र गुन्यांव नोंद करून ताचेर कायदेशीर कारवाय करची अशी मागणी नायक जोडप्यान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
