भांगरभूंय | प्रतिनिधी
पेडणें: धारगळे म्हाखाजन वाठारांतल्या राष्ट्रीय महामार्ग नंबर ६६ चेर सोमारा सकाळीं जाल्ल्या भिरांकूळ अपघातांत साळांतल्या मदल्या वाड्या वयलीं घोव-बायल सोपलीं. ट्रक आनी स्कूटर हांचे मदीं जाल्ल्या ह्या अपघातांत रामचंद्र (रामा) चंद्रकांत राऊत (६३) आनी तांची घरकान्न रेश्मा राऊत हांकां मरण आयलें.
चड म्हायती प्रमाण, सकाळीं तीं कामा निमतान पेडण्यां गेल्लीं. घरा परततना ही घडणूक घडली. जीए-०३-व्ही-८७७३ नंबराचो कॉंक्रीट पावडरान भरिल्लो ट्रक आनी जीए- ०४- एम- ८१९१ नंबराची स्कूटर म्हापशें वटेन वताली. धारगळे म्हा-खाजन वाठारांत पावतांच ट्रकाचो फाटलो टायर फुटिल्ल्यान चालकाचें वाहनावेलें नियंत्रण गेलें. उपरांत ट्रकान मुखारच्यान वचपी स्कूटरीक नेटान धपको दिलो. धपक्यान दुचाकी ट्रका पोंदाक आयिल्ल्यान रामचंद्र आनी रेश्मा राऊत हांकां मरण आयलें.
हे घडणुकेची म्हायती मेळटांच पेडणें पुलिसांनी बेगोबेग घडणुके सुवातेर धांव घेतली. अपघाताक लागून राष्ट्रीय महामार्गाचेर कांय काळ येरादारीची कोयंडी जाल्ली.
रामचंद्र हे कदंब म्हामंडळांतल्यान कंडक्टर पदा वेल्यान निवृत्त जाल्ले. तांचे फाटल्यान दोन आंकवार पूत, भाव, भावजय, पुतणयो असो परिवार आसा. ते साळ गांवांतल्या समाजीक आनी धर्मीक कार्यांत वाटेकार जाताले. तांच्या अचकीत वचपांत पुराय गांवांत दुख्खाचें वातावरण पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
