भांगरभूंय | प्रतिनिधी
भांगरभूंय । प्रतिनिधी
म्हापशेंः भाजपा फुडारी सोनाली फोगड खून प्रकरणाचे सुनावणे वेळार दुबावीत आरोपींक न्यालालयांत हजर कित्याक केलें ना हाचे वयल्यान म्हापशेंच्या पयलो वर्ग न्यायालयांत कोळवाळ बंदखणीच्या बंदखण अधिकाऱ्याक कारण दाखय नोटीस जारी केल्या. फुडले सुनावणे वेळार सीबीआयच्या तपास अधिकाऱ्याक न्यायालयांत हाजीर रावपाक सांगलां. फोगट प्रकरणाची सुनावणी 16 डिसेंबर मेरेन तहकूब केल्या.
फोगट प्रकरणाची सुनावणी पयलो वर्ग न्यायाधीश शिल्पा पंडित हिचे सामकार जाली. ह्या वेळार दुबावितांक कोलवाल बंदखण अधिकाऱ्यान न्यायालयांत हाजीर केलें ना. कित्या खातीर तांका हाजीर केलें ना ताचें स्पश्टीकरण दिवपा खातीर न्यायाधीशान बंदखण अधिकाऱ्याक कारण दाखय नोटीस धाडल्या. सीबीआयन विशेश सरकारी वकील नेमला अशी म्हायती न्यायालयाक दिल्ली. फुडले सुनावणे वेळार वकीलाक घेवन न्यायालयांत येवपाक सीबीआयक सांगलां.
दुबावीत आरोपी सुधीर सांगवान हाचे वतीन अॅड अमीत जागलान आनी अनुभव सिंग जाल्यार सुखविंदर पाल सिंग हाचे वतीन अॅड सुखवांत सिंग आनी राजेश कुमार आनी सरकारा वतीन अॅड पी नारूलकार न्यायालयांत हाजीर आशिल्ले.
सीबीआयन सोनाली फोगट खून प्रकरणात न्यायालयांत 104 साक्षीदार उबे केल्यात तशेंच 2500 परस चड पानांचें आरोपपत्र न्यायालयांत दाखल केलां. तें बचाव पक्षाक अजून दिलें ना. आरोपपत्र आनी हेर दस्तावेज दिवपाची मागणी अॅड सुखवांत सिंग हांणी न्यायालया कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
