कोलकाता नायट रायडर्सान जोडलें सहज जैत

भांगरभूंय | प्रतिनिधी

कोलकाता नायट रायडर्सान इंडीयन प्रिमीयर लिगेंत (आयपीएल) काल जाल्ले मॅचींत दिल्ली कॅपिटल्साचेर 7 विकेटींनी झणझणीत जैत जोडलें. कोलकातान ह्या जैता सयत 12 गूण करीत गुणतकट्यांतली आपली दुसरी सुवात घटमूट केली.

हाचे खेरीत नेट रन रेटींत लेगीत बरीच सुदारणा करून हेर पंगडांचेर चेपण हाडलें. दुसरे वटेन दिल्ली कॅपिटल्साक 11तले सवे मॅचींत हार घेवची पडिल्ल्यान प्ले ऑफा खातीर ताका उरिल्ल्यो सगल्यो मॅची जिखच्यो पडटल्यो.

दिल्लीन पयलीं बॅटींग करतना निर्धारीत 20 ओव्हरींनी 9 विकेटी व्हगडावन 153 धांवड्यो केल्यो, ताका जाप दितना कोलकाता नायट रायडर्सान 16.3 ओव्हरींनी 3 विकेटी व्हगडावन 157 धांवड्यो करून जैत जोडलें.

मोखीचो फाटलाव करपी कोलकाताची सुरवात उत्कृश्ट जाली. फिल सॉल्टान आक्रमक खेळ केलो, जाल्यार सुनील नरेनान सादूरतायेन बॅटींग करून ताका बरी साथ दिली. सॉल्टान 26 बॉलांनी पांच चवके आनी चार सक्यांचे मजतीन अर्द शेंकडो पुर्ण केलो.

कोलकातान 79 धांवड्यांचेर पयली विकेट व्हगडायली. नरीन 15 धांवड्यो करून अक्षर पटेलाच्या बॉलाचेर कॅच बाद जालो. रिंकू सिंगाक वयले सुवातेर धाडलो. दुसरी विकेट सॉल्टाच्या रुपान पडली. अक्षरान ताका बोल्ड केलो. सॉल्टान 33 बॉलांनी सात चवके आनी पांच सक्यांचे मजतीन 68 धांवड्यो केल्यो. रिंकून 11 धांवड्यो केल्यो.

मुखेली श्रेयस अय्यर आनी वेंकटेश अय्यर हाणें कोलकाताचो डाव ट्रॅकाचेर हाडलो. तांणी 40 बॉलांनी अर्द शेंकड्याची भागिदारी केली आनी कोलकाताचें जैत निश्चीत केलें. वेंकटेशान नाबाद 26 आनी श्रेयसान नाबाद 31 धांवड्यो केल्यो.

ते आदीं टॉस जिखून पयलीं बॅटींग करपाचो निर्णय दिल्ली कॅपिटल्साक म्हारग पडलो. कोलकाता नायट रायडर्साच्या बॉलरांनी जबरदस्त बॉलींग घालून दिल्ली कॅपिटल्साच्या बॅट्समनांचेर अंकूश दवरलो. चेपणाखाला दिल्लीन आपल्यो विकेटी लेगीत व्हगडायल्यो. कोलकाताच्या सुनील नरेन आनी वेंकटेश अय्यर ह्या स्पिनरांनी खेळपट्टीचो योग्य रितीन उपेग करून घेतलो.

वैभव अरोरा, हर्षित राणा आनी मिचेल स्टार्क ह्या फास्ट बॉलरांनी सुरवातीकूच दिल्ली कॅपिटल्साक धपके दिवपाक सुरवात केली. दिल्ली वतीन कुलदीप यादवान सगल्यांत चड नाबाद 35 धांवड्यो करून कोलकाता नायट रायडर्सा मुखार आव्हान दिवपा सारकीं धांवसंख्या उबारून दिली.

दिल्लीची सुरवात आक्रमक जाल्ली. पृथ्वी शॉन मिचेल स्टार्काचे पयलेच ओव्हरींत तीन चवके मारले. वैभव अरोरान आपले दुसरे ओव्हरींत पृथ्वीक (13) बाद केलो. जॅक फ्रेझर-मॅकगर्कान (12) हाका शांत दवरपाक कोलकाताच्या बॉलरांक येस आयलें. स्टार्काचे बॉलिंगेचेर वेंकटेश अय्यरान जबरदस्त कॅच धरून जॅकाची खेळी सोंपयली. ते उपरांत अरोरान उत्कृश्ट इन स्विंग बॉल घालून शाई होपाक (6) बोल्ड केलो. दिल्लीन 37 धांवड्यांचेर तीन बॅट्समन व्हगडायले. पूण, ऋषभ पंत आनी अभिषेक पोरेल हांणी बरी बॅटींग करून पावर प्लेंत 3 बाद 67 धांवड्यां मेरेन पावयलो.

हर्षित राणाच्या बॉलाचेर रिव्हर्स स्वीप मारपाच्या यत्नांत पोरेल (18) बोल्ड जालो. ऋषभ सयत ताची 19 बॉलांनी 31 धांवड्यांची भागिदारी सोंपली. वरुण चक्रवर्तीच्या पयल्याच बॉलाचेर ऋषभाक जीवनदान मेळ्ळें. हर्षितान सोंपी कॅच सोडली. ते उपरांत अरोराच्या स्लोव्हर बॉलाचेर ऋषभ फसलो आनी ताच्या हातांतल्यान बॅट सुटलें. पूण, कॅच धरपाक ते सुवातेर एकूय फिल्डर नाशिल्ल्यान ताका परतून जीवनदान मेळ्ळें.

दिल्लीन 10 ओव्हरींनी 4 विकेटी व्हगडावन 93 धांवड्यो केल्यो. पूण, 11वे ओव्हरींत चक्रवर्तीक विकेट मेळ्ळी. सको मारपाच्या यत्नांत ऋषभ (27) बाद जालो. चक्रवर्तीन त्रिस्तान स्तब्साक (4) बाद करून दिल्लीक 99च्या स्कोराचेर सवो धपको दिलो.

दिल्लीन कुमार कुशाग्र हाका इम्पॅक्ट प्लेयर म्हणून खेळपाक धाडलो. सुनील नरेनान अक्षर पटेलाक (15) बोल्ड करून कोलकाताक मॅचीचेर घट पकड मेळोवन दिली. चक्रवर्तीन आपली तिसरी विकेट घेतना कुमाराक (1) कॅच बाद केलो. चक्रवर्तीन 16 धांवड्यो दिवन 3 विकेटी घेतल्यो.

मजगतीं, हर्षितान मॅचींतली दुसरी कॅच सोडली. कुलदीप यादवान णववे विकेटी खातीर रसिख सलाम सयत म्हत्वाची 29 धांवड्यांची भागिदारी केली. कुलदीपान नाबाद 35 धांवड्यो केल्यो. ताच्याय यत्नाक लागून दिल्लीक 9 विकेटी व्हगडावन 153 धांवड्यां मेरेन मजल मारप शक्य जालें.