भांगरभूंय | प्रतिनिधी
कोलकाता नायट रायडर्सान इंडीयन प्रिमीयर लिगेच्या (आयपीएल) हंगामांतले 10वे मॅचींत रॉयल चॅलेंजर्स बंगळुरूक 7 विकेटींनी हारयलो. कोलकातान 16.5 ओव्हरींनी 3 विकेटी वगडावन 186 धांवड्यो करून जैत जोडलें. कोलकातान ह्या जैता सयत येजमान पंगडांचो शेक मोडलो. हे मॅची पयलीं अजून मेरेन जाल्ल्या णवूय मॅचींनी येजमान पंगडांनीच जैत जोडिल्लें. पूण, कोलकातान बंगळुरूच्या घरांत वचून ताका हारयलो. तशेंच 2016 सावन बंगळुरूक एकदाय आपल्या घरच्या मैदानाचेर कोलकाताक हारोवप शक्य जावंक ना. ती परंपरा ही मॅचींत लेगीत कायम उरली.
बंगळुरून दिल्ले 183 धांवड्यांचे मोखीचो फाटलाव करतना कोलकाताच्या बॅट्समनांनी सांघीक प्रदर्शन केलें. फिल सॉल्ट (30), सुनील नरेन (47), व्यंकटेश अय्यर (50) आनी मुखेली श्रेयस अय्यरान नाबाद (34) धांवड्यो केल्यो.
ते आदीं रॉयल चॅलेंजर्स बंगळुरून टॉस हारल्या उपरांत पयलीं बॅटींग करतना निर्धारीत 20 ओव्हरींनी 6 विकेटी वगडावन 182 धांवड्यो केल्यो. ताची सुरवात बरी जावंक नाशिल्ली. पंगडाचो स्कोर 17 जाल्लो त्या वेळार मुखेली फाफ ड्युप्लेसीस (8) बाद जालो. ते उपरांत कोहली आनी कॅमरून ग्रीन हाणें मेळून दुसरे विकेटी खातीर 65 धांवड्यांची भागिदारी केली. आंद्रे रसेलान ग्रिनाक बोल्ड करून ही भागिदारी फोडली. ग्रिनान चार चवके आनी दोन सक्यांचे मजतीन 33 धांवड्यो केल्यो. ग्रिन बाद जाल्या उपरांत कांय वेळान कोहलीन 36 बॉलांनी आपलो अर्द शेंकडो पुर्ण केलो.
ग्लॅन मॅक्सवॅला कडल्यान आक्रमक बॅटिंगेची आस्त आशिल्ली. कांय प्रमाणान तशी बॅटींग लेगीत केली. पूण, व्हड खेळी करपाक जमली ना. ताणें 19 बॉलांनी 28 धांवड्यो केल्यो. हातूंत तीन चवक्यांचो आनी एका सक्याचो आस्पाव आशिल्लो. दुसरे वटेन कोहली अखेर मेरेन खेळपट्टीचेर तग धरून रावलो. ताणें नाबाद 83 धांवड्यांची खेळी केली. ताणें चार चवके आनी चार सके मारले. दिनेश कार्तिकान लेगीत अखेरच्या ओव्हरींनी आक्रमक बॅटींग केली आनी तीन सक्यांचे मजतीन आठ बॉलांनी 20 धांवड्यो केल्यो.
कोलकाताच्या आंद्रे रसेलाक सोडलो जाल्यार सगल्या बंगळुरून सगल्याच बॉलरांची बॉलींग फोडून काडली. रसेल आनी हर्षित राणा हाणें दरेकी 2 विकेटी घेतल्यो. सुनील नरेनाक 1 विकेट मेळोवप येस आयलें. आयपीएलाच्या इतिहासांत सगल्यांत म्हारगो खेळगडो थारिल्ल्या मिचेल स्टार्काची बॉलींग लेगीत बंगळुरून फोडून काडली. ताणें एकूय विकेट घेनासतना चार ओव्हरींनी 47 धांवड्यो दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
